• 【大帥哥視帝民望高】張衛健食麵引混亂 視帝戰重要關頭竟然係買拖鞋 (足本版)
  • 2018-12-15     28,498

 

張衛健(Dicky)唔係TVB親生仔,喺萬千星輝奪獎難度大增,但話晒係曾勵珍、樂易玲落足嘴頭遊說返嚟,加上《大帥哥》播得如火如荼,播放至今短短兩星期已經入圍「最佳男主角」、「最受歡迎電視男角色」、「最佳劇集」等等,認真係來勢洶洶!TVB今屆隨時順應民意頒返個獎俾佢,藉此贏返啲民望都唔奇。難怪Dicky日前去置裝,都係睇返啲大褸、長靴、黑超等十足十大帥哥造型嘅裝束啦,唔通就係為上台領獎做準備?

繼1996年《西遊記》後,張衛健相隔21年再為TVB拍劇,當時《大帥哥》被標榜為台慶劇。消息一傳出都未開始拍攝,觀眾已經好期。不過,《大帥哥》最終無成為台慶劇不特只,播出日期更一拖再拖,延至萬千星輝頒獎禮前13日先首播,令大家覺得Dicky已成炮灰。點知,首集《大帥哥》7天跨平台平均收視已經高達28.5點,係2018年度最高收視嘅二線劇集,且成功吸納唔同年齡層嘅觀眾成為fans。唔係吹水架,張衛健一現身街頭,無論阿哥、靚仔定o靚妹,全部都勁hyper咁要求集郵架!

其實貴為神枱級藝人張衛健都算貼地,出街唔使一大堆助手傍住,一支公去食牛腩麵,所以好快就被眼利市民發現,仲趁佢食飽離開嗰陣連返輪佢瘋狂集郵,好似個旅遊熱點咁樣,更估唔到連麻甩中佬都係佢粉絲。為免再引起混亂,Dicky索性戴返頂連衣帽包實自己,直至入到服裝店先除返落嚟。

喺店舖入面,張衛健先試大褸,後試長靴,之後再轉場睇黑超,真係越諗越似《大帥哥》軍裝風格,唔通堅係試戰衣為拎獎做準備?Anyway,Dicky嘅魅力真係勁到噴汁,莫講話sales姐姐忍唔住要selfie,連老外店員都興奮到攬頭攬頸,名符其實係大明星。試完戰衣嘅Dicky,喺視帝大戰前夕仲有閒情逸致繼續行街買拖鞋,仲要係有公仔好cute cute嗰種。咁嘅心境,係大帥哥先做到。

講咗咁耐,總結:張衛健有觀眾緣,形象正面,而且客觀收視數據理想,連要求高嘅網民都like佢嘅精闢對白,紛紛話投佢「最佳男主角」,就算最終做唔成視帝,起碼都要拎個「最受歡迎電視男角色」啦。