• 【網民讚夠八婆】《愛回家》三太上身 樊亦敏試鞋要Sales跪地幫手
  • 2019-01-07     20,525

 

樊亦敏喺《愛回家之開心速遞》入面做三太,性格夠晒八婆,成日出嚟搞屎棍,不過就係呢啲八婆角色夠盞鬼,佢又做得入型入格,所以每次三太一登場網民都會大讚搞笑好睇。劇中做闊太佢永遠都係濃妝華麗登場,現實中佢嘅打扮就低調好多啦。

呢日《壹》仔見到佢同阿媽去Shopping,行嘅唔係咩名店,而係行山用品店,化返個淡妝,戴返副眼鏡,個人睇落去祥和好多。入店後,佢開始試衫,而阿媽就坐埋一邊,托住個腮好似好悶咁。上身試緊件大羽絨,同時又要試埋鞋,可能係被服侍慣啦,佢無自己著鞋,而係要Sales哥哥跪係到幫佢著,咁睇又幾有三太風範喎!試完第一Round,佢坐低試另一對鞋,今次佢就自己著鞋啦,唔使人服侍。不過呢對佢都係唔滿意,又再要試多對,Total試咗三對鞋。試完鞋,佢又試多兩件褸。見佢試親都係羽絨大褸,又試雪鞋,香港好少日子著得到咋喎,斷估係準備去旅行著嘅。