• 【男星北上為搵食】少時間陪妻兒 送13萬勞力士氹老婆 李雨陽:老婆要錫嘅!
  • 2019-01-12     29,248

 

17年6月,李雨陽同圈外女友鄭嘉詠結婚,同年12月就生咗囝囝小芝麻。不過,因為佢要北上搵食拍劇,所以大部份時間留喺內地,好少時間陪老婆同個仔。‧「大概一半時間喺內地工作,所以囝囝同屋企都要靠老婆照顧。有時候喺內地時間耐咗,BB會唔認得我,都會有啲唔開心,但係見到小朋友開始識得認人,夜晚會揀人陪瞓,或者朝早起身見到其他屋企人都會好開心,笑晒咁飛撲過去,變咗個人都會開心番。」

唔夠時間陪老婆,唔知老婆有冇投訴呢?「投訴就無嘅,因為始終都明白工作係為咗照顧家庭,但係有啲嘢要自動自覺,返嚟香港時都要抽時間陪番太太,同佢出去玩吓,享受二人世界,但係我就比較鍾意一家三口出去,因為始終係一個家庭,唔可以成日擺低BB喺屋企。」唔怪得佢一返香港,就帶老婆同囝囝去嘉年華玩啦!「因為而家小朋友識嘅嘢唔係好多,要求都唔係好高,所以有時帶佢去公園玩滑梯,有得跑吓已經好開心,而家發覺自己好享受呢啲生活,朝早自己去健身後,返嚟沖個涼然後就同BB玩。」李雨陽說。

囝囝未識要求,咁老婆呢?「老婆就唔同,大人要求就高啲,無可能就咁落去公園玩個圈就滿足,都要帶佢出去玩吓,去食吓日本餐,因為佢鍾意食日本料理,有時可能會去打邊爐,約好朋友食飯。」明白,所以老婆一話想要隻勞力士,李雨陽二話不說,就買咗隻13萬嘅勞力士送俾佢,呢個老公真係唔話得!「老婆要錫嘅,所以有時出去工作,如果係去啲環境比較好嘅,例如上海、北京,佢就會跟埋一齊去,應該係話會帶埋佢一齊去,順便去玩吓,佢又可以了解吓我嘅工作。」

攝錄:王志輝

立即下載《壹週刊》Apps,隨時隨地睇盡時政專題、深度偵查、娛樂熱話!

按此連結: http://bit.ly/next28app