• KEYMAN TALK|從分行經理到CEO 見證股市大時代 耀才證券許繹彬:做呢行要覺得自己好窮!
  • 2019-01-18    

 

股票市場,紙醉金迷。

香港交易所,是證券經紀的英雄地。

穿上紅背心,見證大時代。

過去十幾年股票行被國内的金融機構吞併,耀才證券是市場上僅餘的港資券商,其執行董事兼行政總裁許繹彬(Edmond),20多歲就已經穿上紅背心,在交易所替客人落盤做買賣,看盡股票市場變化跌宕。

在證券業磨煉25年,Edmond經歷過97金融風暴、2000年科網潮、2003年沙士、2008年雷曼爆煲,以至2017年港股創新高時代;由分行經理晉升至CEO,受到耀才創辦人葉茂林信任賞識,看準未來趨勢,締造了一個香港式的傳奇故事。

Edmond的座右銘是:做呢行要成日覺得自己好窮!

訪問當日,Edmond由耀才證券位於中環永安集團大廈,沿着天橋走到交易所,回憶昔日做出市代表的情景,臉上依然掩不住興奮。

「呢度我好有回憶,90年代適逢香港股票市場紙醉金迷,我好慶幸可以在97年着咗紅背心,當時股票市場依賴出市員落盤,着紅背心有種飄飄然嘅感覺。」

當年Edmond在景福證券打工,獲老闆賞識,派他做出市代表,「當時我得20多歲,初生之犢,真係覺得自己威,收市後要將紅背心放喺交易所,有時我好希望可以着埋走,如果可以着住喺天橋行,肯定威過威士忌。」

跳槽轉捩點

Edmond 曾經在景福證券及恆豐證券工作,當年亦有不少傳統證券行因生意難做而相繼結束,好些大型的則被國內財團看上,老闆寧願善價而沽。但Edmond卻找到新機遇,轉捩點是看到互聯網落盤的趨勢。

「當時我感覺到互聯網交易的趨勢,美國已有人用互聯網落盤,以前股票買賣要透過經紀落盤,大家要鬥快,我試過替客人落盤,一拎起電話,成日比人鬧,叫我快啲。」

「之後互聯網崛起,我就試用電腦來落盤,發現原來可以自己話事,買乜又得,改盤又得,唔使求人,當年同舊公司管理層傾過呢個問題,問佢哋會唔會考慮轉用呢個方法做買賣,佢哋話唔想改變傳統做法,雖然互聯網落盤當時仍未盛行,但我發現改變好快出現,想博一博。」

不甘沿地踏步的Edmond,在2010年跳槽加入耀才證券,當時耀才主席、有Money hunter之稱的葉茂林正籌備上市,不停開分行,又推行互聯網買賣,以免佣吸客。Edmond見工,葉茂林試他,叫他負責打理油麻地分行,更要他三個月break even(收支平衡),「初初唔好話教人電腦落盤,自己都要學,無辧法,咁大的轉變,我係屋企慢慢試,去到油麻地分行開班教客,教到識為止,舊公司客戶好多都過來支持我。」

但他很快便發現靠舊客都不足以三個月就收支平衡,於是便諗計做宣傳,「人哋返工朝九晚六,我七點就出門口,睇下邊個位多股民,邊間茶樓多人講股票,久而久之,就針對性做宣傳,我會親自派傳單,派一百張,有兩個人問我,已經係贏,我印一百張成本好低,但有兩個人問你,就有機會開戶口。」

千萬大客戶

三分天注定,七分靠打拼,結果給他遇到一個大客,「有次好早去何文田派傳單,遇到有個茶客,我請佢落分行,教佢網上落盤,佢話入少少錢玩下啦。當時分行新成立,我最大的客戶都是開六位數字支票,佢竟然開咗張八位數既支票,我仲好低B咁數出聲,『個十百千萬、十萬百萬千萬、兩千萬!再』數多次都係一樣,我話『咩生,兩千萬喎,佢話係呀,玩下啦。』呢個就成為我VIP客。 原來你肯勤力,落多啲嘴頭就得。」

結果,兩個半月他就成功收支平衡,於是葉茂林又給他管另一間分行,是只隔兩條街的旺角朗豪坊分行,令Edmond哭笑不得,「只係隔兩條街,又要我break even?我心諗,無嘢唔得,又先了解附近地形,原來嗰邊好多銀行股票客,開市時我就走埋去,楔(音:攝)係師奶堆,扮普通客戶,大聲叫『喂, 隔離開咗間證券行,嗰度有位坐,唔使企咁辛苦,佢地成班就走過嚟新店,四點半收市我出現,話我其實係分行經理,有冇興趣轉過來呀,我留張枱比你坐啦。」

結果這次又累積一班新客,一傳十,十傳百,後來更吸引到住何文田、紅磡的人走來開戶,成功開闢第二間分行,獲得葉茂林信任。兩年後,Edmond就轉到總行跟葉茂林學習營運公司之道。

紅潮風暴行家食價

做過小販、紡織起家的葉茂林,90年代投資股票牌照,成立耀才,初期先做期貨買賣,他眼見八、九十年代股票市場透明度低,不少經紀食價,令客戶蒙受損失,這種情況Edmond坦言見得多,「97年紅潮風暴,股價郁得好快,但市民的資訊絕對無依家咁多,無手機睇,無電視股價直播,你想買股票,係聽收音機。」

「當年我係市場見到有行家點做呢?有隻五毫九、六毫的股票,突然間有客打來,要六毫掃十萬,其實隻股票個經紀已經買到,但就唔覆個客得唔得,淨係同客講好呀,結果佢六毫子買咗,好快已經喺六毫三放,跟住話俾客聽,排緊隊喎,六毫子買唔到,佢已經食咗三個價位,好多呢啲嘢。」

葉茂林也曾慘遭食價,他成立耀才,除了希望幫客發大財,亦希望改善巿場運作,二千年代更拓展互聯網業務,建立伺服器系統,以免佣吸納一班互聯網客戶,開拓新商機。

千祈唔好話夠

「我係一個勤力的人,但牛都勤力,重要是要有啟發性,葉生帶我去到另一個層次,唔好只企係自己個位想,要為客人想,不要咁易自滿,唔好以為做了油麻地分行,旺角分行經理就夠啦,咁樣就好似匿入山寨,每日只係不停替人開戶口,分析股票,咁唔會再上一層樓。」

不要自滿背後更最重要的,是要覺得自己「窮」。

「到依家呢一刻,我都覺得自己好窮,金融係一個流水作業的行業,你一日滿足就會後退,我經歷過97年金融風暴、2000年科網潮、2003年沙士、2008年雷曼、2017年港股創新高,乜都經歷過。97年已經做到出市代表,年少氣盛,覺得錢好易搵番來,一搵到就fing,食好嘢,着靚衫,好記得98年就係咁將賺到的錢投機炒賣,結果輸埋,孭住周身債,夜晚去做兼職,做侍應、入油、call台啦,乜都做來填數。」

「結果我領略到一個道理,亦經常用自己的故事去同員工分享,金融市場,有本錢先可以進攻,千祈唔好玩大咗。你每日都覺得自己窮,就會不停去轉點樣去搵新機會,不會原地踏步話自己足夠,如果你耳仔長,齋跟人、聽消息,唔勤力做功課,人炒乜你就炒乜,一定係左手來右手去。」

放工無上限

2016年他坐正做耀才行政總裁,管理22間分行,員工超過300人,更加不敢偷懶。目前耀才證券市佔率超過三成,直播頻道「耀才財經台」更與大陸網站聨播,客戶人數27萬,客戶資產直迫600億。

「我營運這間公司,一個字,真係唔敢懶。我做咗CEO,有人問我,係咪返十點放五點,你公司咁近IFC,係咪日日去四季酒店打躉,我話我在永安集團大廈打躉多, 我希望運用更多時間,令公司run得更加暢順,會不斷去想新的投資方向,股票又好,期貨又好,好似去年股票淡淨,但期貨、美股、環球期貨掂喎,就要即刻轉。」

「營運一間公司同營運一間分行真係好唔同,營運一間分行,你可以開夜啲, 打開門吸客;營運一間公司,你要諗下點樣將22間分行發揚光大,將老闆生意推高向股東交代。」

「我依家返工時間,都係繼續朝八,但晚收幾點係無上限,直至工作做完為止。」

撰文:黎明輝

攝影:梁正平

編撰:黎雅婷

探索驚奇精彩的 wONdEr 故事,請LIKE 我們的Facebook Page,並設定為「搶先看」: https://www.facebook.com/wondermedia.hk/

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app