• 【影圈搶手貨殺入大台劇】BabyJohn:經歷《老表》發現劇集威力勁
  • 2019-01-27    

 

香港演藝界俾人一種感覺:拍電影好似高級過拍電視劇。事實係,唔少喺TVB出身拍開劇嘅,都想跳出公仔箱踏上大銀幕,而真係咁做嘅亦為數不少。相反,憑電影《狂舞派》一舉成名,又有《拆彈專家》劉華加持,BabyJohn(蔡瀚億)稱得上香港影圈年輕一輩嘅搶手貨,但佢倒返轉兩度拍TVB劇集,坦承睇中電視劇入屋嘅威力!

「最大期望就係出街有人嗌我舒奇啦,我嗰日同太太去食嘢都有人講:『呢個咪舒奇?』我係好開心。我經歷過《老表,畢業喇!》之後,就發現電視劇個威力真係好勁,好多6、7歲小朋友嗌我史德華係最開心。有次我去果欄,有個小朋友問爸爸:『佢係咪史德華?佢好似史德華。』我走埋去同佢講:『你搵我?』我覺得係因為一個作品而拉近咗同佢哋嘅距離,尤其嗰啲係小朋友。」



《老表》令BabyJohn驚嘆劇集威力,返尋味再拍《荷里活有個大老千》,有喜出望外收穫,亦令佢有感慨。喜出望外,係因為可以同影帝鄭則仕合作外,更獲得Kent哥貼身指導,唔單只拍完一個鏡頭後講返點樣可以改善,就算套劇拍完播緊,BabyJohn都會每晚追劇,因為「Kent哥依然會打嚟問:『呢集OK嘛?睇落唔錯呀,覺得仲有咩地方需要改善?』」除咗演技,Kent哥嘅工作態度更感染咗一班年輕演員,「唔單只要守時,而係早到。我哋一班人都會早到,原定八點半化妝嘅話,我哋八點就會化妝,八點半已經可以出發。去到現場可能導演仲未set好機,我哋已經喺度排練緊。」

早起的鳥兒有蟲吃,BabyJohn雖然同Elaine姐(金燕玲)無對手戲,但純粹因為早到關係,睇到上一場嘅Elaine姐拍戲,一樣有得著。「佢哋喺大牌檔重遇嗰一場簡直黐線,好似雙人混合體操咁樣。佢兩個唔係格劍,而係互相幫忙推進,好好睇。」BabyJohn激動到差啲爆粗。

至於拍《荷里活》拍出感慨,BabyJohn解釋:「點解我咁鍾意《大老千》呢套劇,因為我好想重回六十年代,一個無社交媒體嘅世界,一個連打電話都要返屋企嘅年代,我覺得嗰個年代大家溝通比較直接,人嘅思想都會比較單純。而家嘅人聰明,但太聰明,聰明到無咗個良心,唔會害死你,但亦都唔會做最好嘅俾你,因為只要做到啱啱好,就好似手提電話,兩三年時間,一升級系統就會壞機,咁樣先可以增加銷量。但,以前一部電話可以用幾十年,掟落地下都唔會碎。以前同而家嘅人心態唔同咗。」



人心態會變,方丈都會變,事關BabyJohn係蕭定一旗下藝人,而蕭定一公司同TVB有官司糾紛,所以大台安排嘅任何宣傳活動必然唔預BabyJohn。不過,方丈今次小氣唔晒,有兩條宣傳片出現過BabyJohn身影,戲份亦無刪減相當足本。對此,BabyJohn話好感激:「今次我好多謝TVB,因為TVB最近喺網上面出咗我一個宣傳片,我係好開心。我知道大家都係做嘢啫,咁有呢啲情況都好正常(指不獲邀出席宣傳活動),所以能夠有個咁樣嘅例外,我自己係好多謝佢哋嘅。」



撰文:梁子健

攝錄:吳斯金

服裝:LUXE TUXEDO LIMITED

髮型:Domanic Tao @O4



立即下載《壹週刊》Apps,隨時隨地睇盡時政專題、深度偵查、娛樂熱話!按此連結 http://bit.ly/next28app



相關文章:

【內地拍劇遇上《喜劇之王》】BabyJohn:欣賞星爺早已拿捏到茄喱啡嘅hea

http://bit.ly/2TeY0UW