• 【內地拍劇遇上《喜劇之王》】BabyJohn:欣賞星爺早已拿捏到茄喱啡嘅hea
  • 2019-01-27    

 

《新喜劇之王》仲未上畫,唔少觀眾已經唔多睇好,主要原因指新戲翻炒舊作橋段:考察茄喱啡演技、踩腳指加強疼痛感、臨時演員拎飯盒等。相隔廿年,笑點一樣,的確講唔過去。但,原來相隔廿年,茄喱啡情況可以一樣、無變,BabyJohn喺內地拍攝《荷里活有個大老千》時,真係遇上《喜劇之王》嘅情況。難怪當人人都指星爺江郎才盡舊作重拍時,BabyJohn仍然勁佩服星爺嘅眼光與細膩。

「我今次去內地拍完劇,我好欣賞阿星爺,佢好早已經拿捏得到一班臨時演員有時嗰種hea嘅狀態,然後將佢變做一個喜劇,因為我喺內地拍劇真係試過。」BabyJohn講得相當興奮,指要同一個臨時演員做對手戲,當自己講完對白後,對方要「吓!」一聲同時俾個驚訝反應。點知該臨時演員「吓」完,先慢慢轉頭望一眼BabyJohn,唔單只動作斷開晒,更唔接戲好似同BabyJohn一啲連繫都無,而且表情係呆吓呆吓無靈魂,有種hea嘅味道。

BabyJohn嘗試教導對方,然後再嚟多次,點知結果係……結果係該臨時演員純粹將頭先反應嘅次序倒轉:慢慢轉頭望一眼BabyJohn,再「吓」一聲。BabyJohn無奈話:「成件事仍然係處於一種局外嘅感覺,佢彷佛喺另一個世界存在緊,我睇完之後真係忍唔到笑。我覺得,嘩!點解咁《喜劇之王》嘅成件事?咁呢個我覺得係幾有趣經歷。」



BabyJohn認為《喜劇之王》依然反映緊現實情況,「星爺地位無人可以達到」,而且亦唔需要去達到星爺嘅地位,因為「每個演員都有自己嘅魅力,都有自己屬於嘅地方,都有自己嘅獨特」。對佢嚟講最想做到嘅只係:「第日會有人同身邊人講,蔡瀚億係一個香港電影演員嚟㗎,都拍咗好多作品,而且作品都好嘅,蔡瀚億就係蔡瀚億囉。」

觀眾眼中,或許認為憑《狂舞派》一舉成名嘅BabyJohn,早已達到一定高度,講上述一番說話未免過謙,但佢深知自己都有過「就咁行過」嘅角色,都係由零一步步開始:「對於我嚟講最深刻就係,由我未入行去到入咗行,我終於有隻水杯寫上自己個名,不過我個名係錯嘅,會變咗BodyJohn,Body。到之後BabyJohn啱咗,到而家我認識咗好多幕後工作人員,然後佢哋會親切到寫Baby。嗰刻我覺得自己真真正正係電影圈嘅一份子,呢個我覺得係好好嘅里程碑。」



撰文:梁子健

攝錄:吳斯金

服裝:LUXE TUXEDO LIMITED

髮型:Domanic Tao @O4



立即下載《壹週刊》Apps,隨時隨地睇盡時政專題、深度偵查、娛樂熱話!按此連結 http://bit.ly/next28app



相關文章:

【影圈搶手貨降呢拍大台劇】BabyJohn:經歷《老表》發現劇集威力勁

http://bit.ly/2RLlDrw