• 【三段婚姻〡曾娶楊紫瓊】潘迪生孖凍齡靚老婆濕平 笑口噬噬拖到實
  • 2019-02-10     29,501

 

家族生意專營百貨鐘錶嘅潘迪生,工作以外最鍾意拖實凍齡靚老婆去Shopping,二人世界之餘,多個人多對眼,睇衫俾下意見都好吖嘛!由畫面去睇,潘迪生份人應該幾隨和,睇衫之餘仲同sales姐姐吹水吹到笑口噬噬。另外,佢肯肯定亦係個愛妻號,對手一垂低就好自然拖實老婆,然後好似塗上AA膠咁唔會鬆開。

潘迪生讀完書出嚟社會後都係由低做起,試過喺鐘錶行做sales㗎,可能亦因為咁對住啲sales無架子,仲幾好傾。關於鐘錶呢行,佢亦去過瑞士做鐘錶學徒18個月,據知更識得自己裝配手錶添。之後就憑喺外國吸收嘅鐘錶業經驗,喺香港創辦鐘錶珠寶店,又取得唔少外國品牌嘅香港代理權,生意越做越大後更撈埋娛樂事業,代表作包括第七屆香港電影金像獎最佳電影獎《秋天的童話》。

不過事業成功嘅高興,都不及婚姻美滿嘅開心,雖然經歷兩次失敗婚姻,包括第二任太太國際明星楊紫瓊,但見佢同現任太太余桂珠拖手行街嘅笑容,就知大家相處愉快,搵到啱嘅另一半。

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app