• 【紅館夢成真】自爆不是處男 30歲許廷鏗:我都有啲經歷嘅!
  • 2019-02-11    

 

3月23日,許廷鏗終於夢想成真,喺紅館舉行處男個唱《再見智慧齒演唱會》,海報上佢仲俾人咀到成口都係唇膏添!「好彩你知道係唇印,因為有啲人以為係剝完智慧齒之後流牙血,其實個唇印係源自阿Jan一句說話,佢話許廷鏗喺大眾心目中,應該仲係一個處男,佢話既然你成日希望有成長、成人禮嘅感覺,就用紅館嚟做呢個成人禮,好似萬二人同我一齊共度初夜咁樣,我嘅第一次。」咁唔知現實中嘅Alfred仲有冇初夜?「現實嘅初夜,其實我都已經三十歲,都有啲經歷嘅。」咁會唔會請啲前度嚟睇?「確實最近有同其中一位前度聯絡過,佢知道我喺紅館舉行演唱會,都有恭喜我,但我就唔敢再問落去,究竟佢會唔會嚟睇?」

Alfred係行內嘅友誼先生,選擇嘉賓名單會唔會好困難?「本身都好想請好多人,就算唔係做嘉賓,都希望佢哋嚟睇,但有一位keep住喺唔同場合,無論公開或者私底下相處都有俾說話我聽嘅,就係鄭欣宜,佢keep住同我講,「有啲人未正式邀請我!」搞到我都要三思睇吓請唔請佢好?因為坦白講,好多同我經歷唔同關口嘅朋友都好想邀請到,好多都真係會嚟睇同支持,我諗呢啲人情債都唔知需要還到幾時。」開紅館騷前,唔知Alfred使唔使節食keep fit呢?「有嘅,最近都努力緊,我諗重點唔係話要瘦到點樣用嚟show off,反而係想喺台上嘅狀態同精神面貌都比較好。」不過,相信佢班fans,最想見嘅係佢嘅爆肌演出囉!「暫時未得,因為嗰日做完健身自拍,覺得自己好白,有啲線條不過太白,要諗吓方法,我又唔想打陰影,因為喺台上會好明顯,所以可能要曬吓燈,到時睇情況,睇吓露唔露啦!」

攝錄:黃志明

採訪:肥A

化妝:Khaki Yan

髮型:Derek Li @ Xenter

場地提供:昭和食堂

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app