登入
  • 安全屋|白告
  • 2019-02-05    

 

「又係SUV,你悶唔悶啲呀?」Poulain一見到FORD KUGA,自然而然咁流露出厭惡感。Takumi先招呼Poulain上車再解釋:「就係SUV先好,咁標奇立異好容易俾人認到㗎。」其實Poulain嘅疑問Takumi早一年已經察覺到,SUV嘅風氣席捲全球,幾乎所有汽車品牌都投入人力物力去設計自家嘅SUV,要分邊部好啲真係唔容易。

上到車後,寬敞嘅車廂空間令Poulain放低對SUV嘅厭悶感,始終SUV嘅舒適度唔係普通私家車所能夠比擬。可能頭先飲多咗幾杯,Poulain一臉狐媚咁問:「今個星期帶我去邊呀?又係上你屋企?」「今日唔得呀,有老虎出沒,我哋去安全屋啦。」Takumi嘅回答,換黎Poulain嬌聲一句「衰人。」

道路兩旁嘅樹木逐漸變得頻密,微雨打落車頭擋風玻璃度。Poulain下意識捉實扶手。Takumi眼角見到,笑住話:「唔駛咁緊張喎,呢部車有聰明四驅,一感覺到打滑就會介入,好穩定㗎。」「你上飛鵝山都揸到咁快。」「咁佢個Turbo有力,好難揸得慢喎。不過我諗係你太輕,部車先有咁好表現啫。」目的地在望,Takumi更用心咁討好Poulain。

停低車之後,Takumi先拉上電子手制,再連接Car Play,播返令人舒適嘅歌單,再示意Poulain一齊去後座坐。開支法國礦泉水擺喺杯架,舒適嘅情況同喺屋企差唔多。「你明白點解咁多SUV出,又全部都咁豪華啦。」Takumi一手將Poulain擁入懷抱,一邊講啲不著邊際嘅話題,慢慢積累浪漫嘅氣氛。

「你又話帶我去安全屋嘅?屋呢?」Poulain喺投降嘅邊緣努力維持住矜持。「安全屋先唔安全,我哋揸車一眼睇曬有無車跟住,仲安全啦。」Takumi將嘴唇靠近Poulain,親吻後再喺耳邊輕輕低語:「唔通我哋好似屯門啲地產經紀咁,喺後樓梯就直接黎,搞到俾人影曬相拍曬片都唔知咩。嗱,你望下個全景天窗,係咪好似喺星星照耀之下做愛做嘅事咁,好浪漫呢?」Poulain尚未回答,身體傳來Takumi手掌嘅觸感,令佢完全失去語言能力。巨大嘅天窗之下,視覺上真係好似直接置身星空之下,但係身體座落喺柔軟嘅車廂座椅,耳邊傳來一首又一首輕柔嘅音樂,Poulain終於明白,表面上唔起眼嘅SUV,實際上可以帶來相當浪漫嘅氣氛,與其喺安全屋入面提心吊膽,不如喺車廂中享受溫柔。

_

轉輪生活|以汽車為主的生活風格專案