• 【潮流興大企業由高登仔話事】小編揸旗決定公司形象 從公關災難中學精:水唔可以亂抽!
  • 2019-02-13    

 

企業形象好壞的確會決定公司於市埸的命運,生死大權可以說是直接落入小編手上,反應快的小編「一句足以救全家」,相反一個不小心,不止是引發關公災難,公司業績隨時跟著插水。

好公關可遇不可求,好像譚仔三哥就情人節於日前推出優惠,指光顧就送十小辣朱古力,有網民留言想睇海景,三哥小編馬上回覆荃灣麗城薈分店圖片,指該店有無敵大海景,後來有網民要求有人拉小提琴,小編又鬼馬回答「用自己手機播收唔收貨」,獲得網民大讚貼地搞笑;另一好例子,就是國泰為年頭系統故障時大派的半價頭等機票找數。國泰公關出名靚抽,上年發生一架777客機機身串錯公司名的大錯,被網民恥笑指公司高層不識字,多得小編自己抽自己水,指串錯字航機為特別版,又化一劫。

社交媒體傳訊公司SSHK,其老闆是曾經幫薯片叔叔搞選舉工程的公關團隊,四位老闆本身透過高登討論區認識,成立社交媒體顧問公司僅一年,就有過二千萬元生意額。他們指現時做公關不能再用以前一套:「以前嘅時代好多事情發生出咗問題,通常第二日啲人打開報紙主要幾份頭版先見到問題所在,大公司通常都係咁,但而家好多時(訊息)燃燒得好快,今朝有人鬧,中午已經全世界都講緊。」Terry指那種傳媒聯絡要「入Q等上頭指示再等公關出稿回覆」的形式已過時:「所有嘢都出現得好快,消失得好快,香港各行各業都要適應這個變化。」

水,抽又驚抽錯,不抽又怕錯過,何時該抽何時不該抽?吉野家去年藉阿根廷於世界盃小組賽被克羅地亞以3:0擊倒一事,趁機抽水宣傳新優惠,被阿根廷球迷抗議罷食,吉野家小編隊都是90後年輕人,他們笑言沒想到網民會有如此激烈反應,但只是澄清就無需緊張:「客户好放手俾我哋揸旗(話事),我哋會同佢講唔使緊張,媒體報導加入我哋回應同澄清立場後,網民反應都變得正面。」小編又指很多時候出貼文或回應不需要得到客戶或公司批准,「因為反應要夠快先有attention(關注),客戶都支持我哋踩踩界,營造企得較前形象。」

另一位老闆Alex指抽水會形成「關公災難」與否,重要關鍵是在於你的受眾主流意見:「你唔可以please(討好)全部人,一定有人唔鐘意你,只要你的segment(主要受眾)支持就夠。」他指把關的重任在於企業老闆,「要留意敏感度,講緊係唔係所有嘢都可以拎出來放上Facebook去講去開玩笑,唔係淨係好笑得意就可以。」

Alex又建議有數個議題特別容易中公關災難,媒體要避忌的話可以作為參考:「第一為中港矛盾,第二是較敏感的性別議題,第三是社會時事,呢啲議題係唔係適合抽水適合玩,把關嗰個要好留神。」

撰文:黎諾瑤

攝錄:林志謙、林金展

立即按此連結下載《壹週刊》APP,隨時隨地睇盡時政專題、深度偵查、娛樂熱話!

按此連結 http://bit.ly/next28app