• 【41歲劉明軒匆匆入酒店】搭上廖碧兒前度有錢仔 一齊步出酒店再吻別
  • 2019-03-12     32,307

 

有線前主播劉明軒已經41歲,單身多時仍未有新戀情曝光,不過早前《壹》仔就捕獲到佢同廖碧兒個ex、富二代Calvin盧啟賢,一齊步出酒店,嚟咗個goodbye kiss後,再由男方開門送上車,目送離開。

其實早有傳媒發現劉明軒同盧啟賢曾經一同用餐,不過當時仲有2男1女同行,所以女方亦官腔解釋:「幾個朋友食飯何足掛齒。」並無正面回應點睇男方、有無發展機會等問題。

不過,《壹》仔早前目擊劉明軒揸車去到酒店,短打晒腿嘅佢交低架車畀職員泊,自己就匆匆入酒店。等咗若干時間,劉明軒再次現身,喺大堂同一高大,且西裝骨骨睇落好斯文嘅男士傾偈。雖然當時環境昏暗睇唔清該男子何方神聖,但從二人肢體動作睇得出,佢同劉明軒好啱嘴形好投契。直到有人開門一瞬間,窺見得知原來男方就係廖碧兒個ex盧啟賢。

之後盧啟賢送劉明軒出門,佢表現得好有風度,側身讓開畀女士行先,又主動伸手攬向女方背部,然後嚟個禮儀上嘅goodbye kiss,再示意劉明軒架車已到。行到香車前又幫手開車門,最後企埋一邊遲遲唔離開,直到目送劉明軒遠去自己先上車。咁風度翩翩係女都冧啦,何況據聞外形俊俏嘅盧啟賢,家族生意覆蓋保險酒廠等行業,居住4千萬豪宅,更有私人飛機,亦有報導指佢曾豪使億元買酒,啱晒劉明軒擇偶條件。

劉明軒揀仔不嬲有一手,曝光過嘅男伴個個非富則貴有地位,今次同盧啟賢做朋友,貫徹風格。不過,盧啟賢一直有個富貴泰妹正印Nina,二人成日孖公仔拍拖,有時男方仲會帶埋同前妻所生嘅女三人行過family day。劉明軒會否好似當初廖碧兒咁,同盧啟賢快嚟快去㗎?

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app

相關新聞:【劉明軒拍親拖都好大鑊】恒生後人爭業權 才俊閃婚閃離 人夫11日6短聚 http://bit.ly/2CaDa2N