• 【呢個師奶係億萬富婆】陳松伶捱過財困患抑鬱日子 掃完內地物業返港掃Hermès
  • 2019-03-11    
馬上成為壹會員
會員專區 只限會員閱讀

 

48歲嘅陳松伶,06年隻身返內地搵新生活,期間患過抑鬱症。嗰段日子,佢一無所有,幾經辛苦先再重整佢嘅人生,依家就唔同嘞!唔單只婚姻幸福,生活亦由05年時,食飯錢都成問題,扭轉到今日無憂。

呢日唔使為新劇《福爾摩師奶》做宣傳嘅佢,就好似闊太生活一樣,約班親友食完午飯,下一個節目,係去名店Hermès掃貨,喺店裡面睇衫睇鞋不知幾開心,走嚟走去搵心水嘢!唔只主攻衫同鞋,佢呢轉仲主力掃Hermès嘅餐具。據知,松松早排又喺北京豪宅區買咗新屋,同陳曉東做咗鄰居。近日新居入伙,鍾意儲Hermès杯杯碟碟嘅佢,今次又去入貨,最後攞住兩大袋離開,真係滿載而歸。

依家嘅佢,可以買嘢買得無後顧之憂,人又開開心心,同十幾年前境況好大對比。

05年佢過著食餐飯、買件衫都要三思嘅困境,當時佢同經理人兼契家姐結束合作關係後,一個人重新開始,生活陷入困局。之後幸得提攜過佢嘅陳淑芬幫忙,搵佢做音樂劇《雪狼湖》,令佢可以維持生計,有錢供深井層樓。

06年佢去內地,搵新嘅開始,但之前嘅不快經歷,同生活嘅無助感,令佢患上抑鬱。

緣份天註定!喺佢最脆弱時候,拍內地劇《血未冷》邂逅細佢八年嘅老公張鐸,佢話:「當時冬天,張鐸冚住羽絨休息緊,但當見到身旁嘅松松對緊稿,張鐸二話不說將件外套讓俾佢,就係呢個細心嘅動作,俾到松松一份安全感。」

張鐸陪住松松走過幾年嘅抑鬱路,將佢照顧得無微不至,之後結婚,互相扶持至今。

勝過抑鬱後,主攻內地嘅松松知名度日漸提升,拍劇身價由每集十二萬,上到廿萬。加埋密密登台、上綜藝節目、近年參演國內巡演嘅音樂劇等,有指佢每年有成千萬人仔進賬。久不久返港幫大台拍劇,純粹還下人情啫!

一直對理財毫無概念嘅佢,多得老公張鐸同前輩鄭明明教路下,09年開始喺內地買樓。

咪睇松松姐姐打扮樸素,只係孭住個萬零蚊嘅手袋,查實佢依家手揸多個物業,遍佈香港、北京同上海,內地主攻嘅盤亦係高尚住宅區,其中北京朝陽區,就連掃五個千呎單位。15年,佢以二千三百萬,同老公聯名喺香港買咗個何文田豪宅,之前升到三千幾萬。

多年來,佢將部份嘅磚頭出售賺一筆,亦有手持至今用嚟放租,有指今日松松姐姐嘅身家,保守估計過億呀。

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app

相關新聞:【到美國雪卵 人工受孕不成】48歲陳松伶因巡演 領養計劃要擱置

https://bit.ly/2EZSktc