• 【久未露面人氣下滑?】民選港姐朱千雪 素顏出動無人認得
  • 2019-03-13     29,662

 

大家仲記唔記得,對上一次喺公仔箱見到朱千雪係幾時嘅事?《壹》仔首先醒起《踩過界》,原來已經差唔多兩年,係2017年嘅劇。咁耐無見,早前難得喺街撞到佢,都仲係咁靚。無化妝素顏,更多咗份親切感。

2017年被網民票選為《十大最索港姐》嘅千雪BB,參與《踩過界》都係客串性質,之後再無拍劇。睇返資料,佢呢兩年喺TVB嘅工作主要都係擔任綜藝節目嘉賓,就算做節目主持都係一集起兩集止,而且大多都係2018年嘅事。2019年已經過去3個月,佢只做過《2019國際中華小姐競選》評判團成員,能夠見佢嘅機會真係少之又少。

無計啦,據知千雪BB而家讀緊法學專業證書,仲要讀多年幾,換言之最快都要2020年先會正式回歸幕前,如果大家仲記得佢、人氣依然高、TVB仲肯用佢嘅話。所以,佢自己都擔心觀眾會忘記佢㗎,亦都會嘗試同TVB傾吓嚟緊暑假會否安排到節目俾佢拍,希望有最低限度嘅曝光。佢仲呼籲可以多啲邀請佢出event。

擔心都啱㗎!話晒係2012年港姐「民選冠軍」,加上擁有「最索港姐」、「千雪BB」等親切名號,出到街理應好多人認得佢、集佢郵。實情係,素顏同上鏡無乜分別嘅佢坐定定喺度,但人來人往都無人認出佢,有啲估唔到。不被外人打擾可以話係樂得清閒,但如果想繼續娛圈打滾,咁嘅情形就真係有啲危險喇。不過千雪BB咁叻,咩行業都無問題啦。

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app