• 【福爾摩滴滴仔打入熱搜榜】為增添兄弟情誼 杜大偉唔用替身一身傷
  • 2019-03-28    

 

《福爾摩師奶》嚟到結局篇,節奏推進終於明快,而且滴滴仔(徐榮飾)被殺更加令人婉惜傷心,估唔到仲打入咗微博熱搜榜添。仲有一樣估唔到,就係已經入獄嘅白羅拔(杜大偉飾)仍有出場機會,為場戲增添感人嘅兄弟情誼!

獄中嘅白羅拔已經放棄咗自己,所以喺拳賽中被囚友打都唔還手。直到諗起滴滴仔死咗,希望用碗牛雜送兄弟最後一程先至還擊。呢場戲拳拳到肉,但原來大部分都係由杜大偉親身上陣:「我嘅造型實在比較獨特,所以太多動作用替身嘅話好易穿崩。」因此,佢喺IG post出傷痕累累嘅相,唔係化妝、特效,堅係受傷。

「對打時有好多拉扯動作,導致雙手好多瘀傷,而且為增加視覺效果,好似被推撞向鐵閘同床板嘅動作,難免會擦損。至於左胸上嘅瘀傷,係因爲我想中腳嗰個特寫都由自己親身上陣先會整瘀。其實同我對打嘅動作演員都有同我類似嘅瘀傷,整個團隊都係為咗拍場好戲。」杜大偉文字回覆《壹》仔。

如此攞命嘅對打戲,能夠一take過就最好,但杜大偉拍攝時認為出嚟效果欠佳,NG咗幾次,仲叫對手畀多啲力。前後只係一分鐘左右嘅戲,就拍到成身傷,值得嗎?杜大偉話:「作為一個專業演員,往往會為一場好戲而不惜付出代價,只要出嚟效果好嘅話,一切都會覺得值得!何況呢場戲,係令觀眾對白羅拔呢個角色改觀嘅最好場口,一反劇初時嘅討厭形象,所以再辛苦都值得。」

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app