• 【福爾摩師奶80歲蓮婆】老來轉行做演員 晨早6點開工最遲天光收工 再攰也不言休|壹早娛樂
  • 2019-03-31    

 

《福爾摩師奶》入面嘅蓮婆,雖然戲份唔多,但相信觀眾對佢都幾深印象,一嚟佢好精靈好搞笑,成日語帶雙關話自己唔見咗隻豬;二嚟係因為佢殺咗正義嘅狄練目(徐榮飾),令觀眾睇到好心噏,但見住佢一把年紀死喺監牢又唔忍心。

飾演蓮婆嘅呢位老人家,叫楊依依,網上搵到一啲佢參與過嘅廣告、短片、劇集,但關於佢嘅個人資料唔多。據其他媒體訪問得知,原來佢60歲退休後先加入電視台拍劇,一拍就20年,仲話TVB十部劇有七部佢都有份參與!咁樣講開,好似《愛•回家之開心速遞》見過佢喎,第一集出現過嘅八姨婆。另外,ViuTV《身後事務所》都見過佢嘅身影。

大家都知喺TVB拍劇不時要捱更抵夜,年近80嘅楊婆婆都唔例外,試過最早6點開工,最遲天光先收工,一樣係好天曬、落雨淋,拍街戲無凳坐。雖然辛苦,但楊婆婆出身文藝家庭,爸爸寫粵劇,細個跟過紅線女學做戲,所以對演戲有種執著,有對白無對白佢都享受,仲百無禁忌,抱住「未死就知道死後係點風光大葬,睇見都開心」嘅心情,棺材都照瞓!

楊婆婆不言休,仲話要虛心學習拍好啲,又會喺劇照寫上何年何月同何人,拍過乜劇,就好似曉堯寫日記提醒自己一樣,話希望自己唔喺度時,畀兒孫睇都好。

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app