• 【大台根本carry唔到《福爾摩師奶》】估開膛手同買六合彩一樣無跡可尋
  • 2019-03-30    

 

《福爾摩師奶》大結局,所有開膛手都公開晒,不過好多都唔係雀屎夫人(陳松伶飾)查出嚟,而係啲開膛手自爆講晒個經過出嚟。咁,仲算唔算係呢套劇標榜嘅「懸疑查案」呢?

有人話,大台啲劇只需要睇前三集同尾三集就得,原來唔係亂噏,以《福爾摩師奶》呢套劇為例,前三集交代落難嘅雀屎夫人同命案有關,為洗脫嫌疑追查真相;後三集鼠疫橫行,最終逼到高明醫生(陳嘉輝飾)自殺留遺書,寫晒殺人經過。至於中間嗰十幾廿集嘅支線,都同上述結果無乜關係,亦無提供任何線索。

其實,呢套劇嘅構想唔差,如果關於咁多位開膛手嘅線索,逐少逐少咁喺25集入面滲出嚟,再被女主角雀屎夫人發現、破解,咁絕對係套好劇。不過而家嘅情況係「眼高手低」,開大咗個頭話係懸疑案有開膛手,但最後都係啲食咗誠實豆沙包嘅兇手逐個走出嚟自爆,而且最大問題係,唔係大台唔想滲啲線索出嚟,而係根本無線索可言,因為咁多個開膛手嘅解釋都係牽強地自圓其說、無跡可尋!換言之,雀屎夫人其實無料到咩都查唔到,反而生安白造咗個開膛手出嚟搞到人心惶惶,繼而影響其他殺人犯有樣學樣玩開膛。

雖然,以懸疑查案嚟講,《福爾摩師奶》有啲貨不對辦亂咁嚟,之不過喺大台愈來愈多外購劇嘅情況之下,能夠有套自家製,總好過星期一至五晚7點睇完《獨孤天下》,8點半又睇《皓鑭傳》啦。

立即下載《壹週刊》Apps,隨時隨地睇盡時政專題、深度偵查、娛樂熱話。按此連結 http://bit.ly/next28app