• 【報警都搵唔到】俾好友呃咗3百萬積蓄 37歲李日朗患痛風要日日食藥
  • 2019-04-14    
馬上成為壹會員
會員專區 只限會員閱讀

 

過咗幾年北漂生活嘅李日朗,打通咗人脈,叫做有人識,有嘢拍!17年,佢返嚟香港做嘢,同昔日好友夾份做生意,點知唔熟唔食,竟然俾好友呃咗近3百萬積蓄。

李:係好朋友嚟㗎,因為我淨係同好朋友一齊做生意,我唔知道你係咪一樣,基本上喺呢個圈十幾年,進貢晒所有時間,識嘅朋友可能就係圈內人,如果難得有一啲圈外朋友,真係好可貴難得。呢個朋友其實都認識咗好多年,有次夾份投資做生意,賺咗錢之後個人就唔見咗。

好友人間蒸發,就算李日朗報警都冇用。

蓋:真係搵唔到?

李:搵唔到,我都想問吓香港警方係咪真係咁難?到而家都真係仲未搵到。我覺得人唔可以失踪一世,嗰筆錢我由好等住用,到唔等住用,而家只會心諗,你夠膽就唔好現身,即係而家會係咁嘅態度。不過我相信因果,今日做過嘅事,可能唔係聽日回向番俾你,但你種咗一粒咁嘅豆,將來一定會有個結果俾番你,只不過係時間問題。

蓋:每件事都有得有失,呢件事就失去咗金錢,咁得到咩嘢呢?有咩得着?

李:無喎。

蓋:有嘅,例如識朋友或者揀朋友方面?

李:黐線啦,呢啲小學都有教啦,老師會話俾你知,佢好曳,唔好同佢做朋友。無㗎,邊有咁多嘢學㗎!

蓋:以後識朋友會定下底線,或者無咁容易同人深交?或者唔會再涉及金錢?

李:喺我嘅角度,我比較樂觀,會覺得如果死喺朋友手上,會好好笑。即係我哋做戲嘅,你喺一個做戲嘅人身邊做咗幾年戲。

蓋:你都唔察覺佢做戲。

李:然後佢仲可以攞住你筆錢走咗,真係上咗一堂啦。當我哋呢一行有好多老前輩教人做戲,大家都扮戲劇大師嘅時候,我身邊原來已經有一位戲劇大師。你唔可以因為呢件事而唔再相信朋友,一定要繼續信,只要你繼續生活就要繼續信,只不過覺得以後要小心啲囉,但其實可以點樣小心呢?

蓋:盡量研究多啲戲。

李:我咪當睇咗一場好貴嘅舞台劇,佢喺你身邊活生生咁演,廿四小時不停演,佢係成功嘅。俾好友呃錢後,李日朗近年患有痛風症,認真禍不單行。

我係喺上年發現有痛風,最初都唔肯定,以為自己壓力大,瞓覺得一隻腳踢腫另一隻腳,令到自己起身時覺得痛。直至有一次真係痛到郁唔到,好腫,朋友帶咗我去睇醫生,因為自己真係行唔到。之後醫生驗到我係痛風,佢當時話我知痛風未有得根治,有機會係遺傳,

亦同生活習慣有關。

37歲嘅李日朗咁後生就有痛風症,連最愛打嘅籃球都少打咗,每日都要食藥,係個長期病患。

其實我諗自己算係幾嚴重,因為本身好鍾意食海鮮,雖然已經無飲酒幾年,但可能因為食海鮮,而家戒口已經戒得好清,基本上每一日都會食藥,其實食藥同食少啲海鮮都唔係最大問題,最大問題係唔可以做劇烈運動。而家每次做劇烈運動,例如打一次籃球,去到第三日就會痛,隻腳會腫。所以而家都喺治療階段,希望跟住醫生指示,盡量令痛風唔好翻發。

策劃:肥A

攝錄:黃志明、蕭敬漁

化妝:波兒(嫁妝)

服裝提供:levis_hongkong, palladiumhk, memoriginhk

「壹起出手,撐新聞自由!」
立即免費訂閱《壹週刊》

登記成為壹會員,睇盡獨家內容,會員活動!

http://bit.ly/NextSubscrition30

【逐步教學】立即登記訂閱《壹週刊》! 免費無阻睇盡全部精彩內容

http://bit.ly/2UWG7hI