• 港大乳腺外科教授鄺靄慧護身有道 勤做瑜伽自細買保險
  • 2019-04-18    

 

港大乳腺外科教授鄺靄慧是乳癌及基因專家,醫治輔導過不少癌症病人和家屬。

醫生也是人,也會病倒,有段日子,鄺靄慧曾因為痛症影響工作深受困擾;她丈夫李維達是眼科名醫、養和醫院院長,也因為患上前列腺癌承受很大的治療壓力。

從醫生變成病人再成為病人家屬,鄺靄慧對病患及保健有更深的體會,雖然忙到無時間瞓覺,也必定抽時間做瑜伽;她從細便買醫療保險,笑說最緊要有得揀。

身為外科醫生,鄺靄慧説最常見的毛病是脊椎勞損,壓住神經出現的痛症,「好多外科醫生做手術,成日低頭,脊椎好容易勞損退化得快,有機會壓住神經,曾幾何時令我好惆悵。」

不是癌症但一樣辛苦

相對癌症等重症,脊椎勞損聽起來不算大件事,但對於要做手術的外科醫生,壓住神經缐導致手部刺痛麻痹,可大可小,「有段時間我痛到瞓平都唔得,返工坐又唔得,在診所要坐在病床斜斜地45度對住排板教醫科生做嘢,雖然唔係癌症,但痛症都好辛苦,心想係咪永世都咁痛落去呢,諗起都幾可怕,因為會影響工作。」

她吃過止痛藥,但功效不顯著,唯有改變工作和生活模式,「例如做手術唔再長時間低頭,會調整一下姿勢,之前做研究經常用laptop低頭做,於是換咗個大啲既熒幕,唔使個頭跌到咁低。」

「我一向都有跳舞玩音樂,出事之後做多咗物理治療和瑜伽,矯正咗自己的姿勢,以前我差不多唔瞓覺做嘢,而家會盡量瞓多啲。好多人覺得好忙無時間做運動,我覺得是借口,持續做真係可以幫到健康。我放工好夜先去做瑜伽,但都好過唔做。」

半年後情況改善,現在已沒有再痛再痹,這次經歷給她一個好大的提醒,「可能我太固執一定要完成所有工作,做唔到都要做,所以個天要我停,透過身體向我發出警號,同事知我勤力,都話你要健康先醫到人,正如飛機在空中遇到事故,飛機廣播都會要求乘客顧好自己才去幫人。」

香港醫療不算差但要有得揀

而身為醫生,她也為自己買醫療保險,「我在英國讀書時已經開始買,供到而家,由於自細買起,保費會便宜一點,到出來行醫,又要再買額外的醫生保險保障自己,所以我有兩種醫療保障。」

香港政府醫療差不多是免費,但近年人手短缺、輪候時間長等問題仍未妥善解決,鄺靄慧認為買保險可以給自己多一個選擇。」

「香港醫療雖然有人投訴要等,但整體服務唔算差,我在英國大,發現最緊要有得揀,所以一早讀書已買保險。萬一個病好急,你唔想等政府,有保險其實不是一件壞事,這筆錢放在保險公司入面,到有需要用時其實都是你自己付出的。」

有病要有得醫,家人的支持亦好重要,更要學識觀察入微。鄺靄慧丈夫李维達八年前患上前列腺癌,她便放下手上的工作陪他到美國醫病,同行相伴。

「我先生點解會發現有事呢,當時他參加毅行者,之前行了好幾年,到又要再行第四年時,我就同佢講,毅行者好辛苦,我擔心佢個心臟,因為年紀有番咁上下,要佢去之前要做檢查,結果其中一項檢查就發現有前列腺癌,當時啱啱係農曆新年前,佢冇話我知有癌,因為我地計劃去英國旅行,佢唔想糟蹋咗個假期,他是醫生,知道前列腺癌不是其他癌症會好快惡化,所以等到返來先話我知,我聽到即時喊咗出嚟。」

老公忍尿做電療好大件事

後來李維達要去美國做最先進的質子治療(Proton therapy),她也跟着去,做私家看護給他支持,「當時我好忙,成日掛住做嘢,他們全家都無諗過我可以放低一切,陪個老公去醫病,原本諗住搵私家看護輪流陪佢,直到我話會跟埋去就唔使請啦,我仲去咗幾個月,佢好開心同欣賞,大家有說有笑。」

不過,治療期間也承受不少壓力,「質子治療其實是一種電療,我好記得,他做這種電療前要飲好多水,令到膀胱脹咗先可以做,你知咁急小便好辛苦,你可以話這在癌症治療中係好小事,但對病人就是好大件事,好辛苦,要識得體諒。」

「我又好記得有個病人,係我一個朋友既兄弟,癌症無得醫,離世當日突然話好希望張床放係窗側邊,當時我唔係太明白,點解佢想咁做,後來家人話佢好開心,因為可以見到外面……當你身邊的人、好朋友都病過,你先會見到一些你做醫生時睇唔到既細微卻重要的事情,同病人的關係會再personal多一點。」

基因測試仍然有很多未知

身為乳癌基因研究權威,她發現有家族性遺傳基因突變的人,會有較高風險患上乳癌,而且癌細胞會較惡及在年輕時發病,及早做測試可以提早預防和治療,但她說基因學現時所知的依然有限,雖然現時很流行把口水送去外國就可以做基因測試,但她並不認同這種做法,「我做基因研究,固然想知好多未知的事,但如果只識叫人做測試,又解釋唔到如何預防及治療,有些人都可能好想知會接受,但有些人發現自己有基因突變,醫學上又沒有人解釋得到會有甚麼問題,他亦未有病,成世人就得個驚,對我來說就是對他不好。」護身要有道,行醫,更加要有。

撰文:黎明輝

攝影:梁正平



探索驚奇精彩的 wONdEr 故事,請LIKE 我們的Facebook Page,並設定為「搶先看」: https://www.facebook.com/wondermedia.hk/

立即下載《壹週刊》Apps,隨時隨地睇盡時政專題、深度偵查、娛樂熱話!按此連結 http://bit.ly/next28app

「壹起出手,撐新聞自由!」
立即免費訂閱《壹週刊》

登記成為壹會員,睇盡獨家內容,會員活動!

http://bit.ly/NextSubscrition30

【逐步教學】立即登記訂閱《壹週刊》! 免費無阻睇盡全部精彩內容

http://bit.ly/2UWG7hI