• 【唐寧免費幫拖】爸爸離世媽媽昏迷2個月 王若琪:送畀佢嘅一份禮物
  • 2019-05-16    
馬上成為壹會員
會員專區 只限會員閱讀

 

08年入行嘅王若琪,音樂路一直不平坦,雖然係咁,佢一直都冇放棄。最近,佢出咗首新歌《重圓》,仲搵埋好友唐寧幫拖拍MV,佢話:「我諗喺香港嘅八十後都無人會唔認識唐寧。點解會搵唐寧呢?因為我好想搵一個演技好嘅演員,唐寧係絕對無令我失望嘅,我將故事結尾收場喊嗰部份,直至重遇都由佢去演繹,希望大家留意吓呢一點。」聽Takki講,首歌係送俾爸爸嘅,點解呢?「呢十年其實自己經歷咗好多嘢,如果有留意我社交平台嘅都會知道,屋企發生咗好多事,爸爸走咗,媽咪病咗,對我嚟講打擊係幾大。今次都有用上粵劇概念,因為爸爸係粵劇領班,即係類似band leader咁樣。坦白講,由細到大其實都無特別好鍾意粵劇,覺得好嘈、好老土,直至爸爸離世後先開始研究粵劇,發覺原來係一件好高深嘅學問,無十幾廿年訓練時間,係唔可以走上台。爸爸離世後,當送俾佢嘅一份禮物啦,媽咪睇完之後都好開心。」

除咗爸爸離世,Takki媽媽亦因豬流感併發症肺炎,入咗ICU昏迷左兩個月先醒返,而家右邊身郁唔到同埋唔識講嘢。「佢好厲害,雖然身體出現問題,但比好多人都厲害,比《淪落人》入面嘅黃秋生更厲害,佢係真實版而且情況更嚴重,但都學懂歡樂,我希望《重圓》可以送俾一啲失去親人、伴侶,或者唔係已經去世,而係今世唔可以一齊嘅伴侶,得唔到嘅人,希望有一日佢哋都可以重圓。」咁唔知唐寧,知道要化大戲妝拍MV有咩感覺。「古裝我雖然做得多,但大戲妝真係從來未試過,我都好想知道自己嘅大戲妝會係點樣,所以非常吸引我,於是即時答應一齊去做呢個MV。」咁係唔係免費幫老友手先?「酬勞方面,我覺得最重要係自己想唔想做嗰件事,佢有俾利是我嘅,因為大家都係朋友,所以今次叫我幫手都即刻二話不說,加上自己都好有興趣,我最希望嘅反而係出嚟效果好,大家都鍾意呢個MV,亦喜歡呢首歌,就已經好滿足,希望可以有呢個效果。」唐寧除咗幫Takki拍MV,仲有拍吓其他嘢。「自己都參與咗一啲短片同微電影製作,陸續都會有啲作品面世,希望大家留意。最近好開心,做咗好多自己喜歡嘅工作,希望大家都會鍾意。」Takki新歌《重圓》MV邀請咗劉惠明老師嘅陽明粵劇社兩位小朋友幫手,老師亦非常幫忙,拍得好認真,加上係Takki自資拍嘅,大家不妨支持吓!

立即下載《壹週刊》APP,精彩內容壹手掌握

下載連結: http://bit.ly/Next29App

如對會員訂閱制遇到任何問題或意見,你可以致電 2623 9985,或電郵聯絡客戶服務主任 cs@nextdigital.com.hk,我們定當盡力協助!