• 【醉駕講大話仲要偷食】大隻仔郭子豪背正印 偷食港姐孖住睇樓築竇
  • 2019-05-22    

 

正印小三安排去同一健身院

讀者爆料,醉駕又講大話嘅郭子豪,有個做藝術工作嘅圈外靚女友Karen,拍咗拖三年,連出事嗰架車嘅車牌「AKY」,都係佢同女友英文名縮寫結合而成,好識氹女友架!不過今年初佢同18年港姐亞軍兼最上鏡小姐鄧卓殷,一齊拍《娛樂玩家》之後暗撻著。讀者仲話,喺goji玩健身兼教人嘅郭子豪,安排小三鄧卓殷嚟佢地頭做gym,而佢正印Karen都係喺佢任教嘅地方健身喎!一班職員仲叫正印Karen做郭太。正印小三都安排喺同一間健身院,呢個橋段同安心偷食咁相似嘅。而goji裡面嘅人,好多都知道郭子豪同鄧卓殷嘅地下情關係,反而正印Karen就蒙在鼓裡。

趁正印不在港 孖小三旅行

郭子豪劈得腿,偷食梗係有技術啦!原來四月時,曾經有網友發現郭子人豪同一個矮佢成個頭嘅女仔,鬼祟出埠玩,兩個驚俾人認出,戴晒口罩。但眼利網民一眼就認出係佢,而女嘅高度同副銀絲眼鏡,同鄧卓殷好脗合,睇番正印IG,原來嗰段時間身在美國工作,似乎郭子豪係趁女友飛咗,即刻把握時間孖鄧卓殷出埠玩。上月,醉駕後嘅郭子豪俾第二間傳媒影到佢拖正印Karen出街,果然分身有術。可能劈腿心虛,之後郭子豪索性將過往post 喺ig,同正印Karen嘅sweet合照剷走。

新歡挨住睇樓築巢

郭子豪同鄧卓殷各自同屋企人住,為方便密會,又唔易俾正印女友發現,近日決定租個竇。本刊發現其中一日,佢兩個一齊返完教會,先去九龍城食甜品。因為背住正印偷食,呢段關係唔可以曝光,所以一齊出街,佢地都表現得好小心。不過小心還小心,偷食熱戀中,身體就變得好誠實,兩個唔係頭貼頭睇餐牌,又係黐實睇對方嘅手機。

兩個睇中啟德新樓做同居竇,一口氣睇咗幾個租盤,等緊經紀時,鄧卓殷永遠一副冧滋滋眼神望住郭子豪,又不時挨住對方。

上庭前漏夜搵正印

呢頭同新歡睇樓,轉過頭喺佢上庭前一晚,郭子豪拍完《娛樂玩家》,即揸車趕去大坑搵正印。郭子豪將車泊喺正印Karen屋企樓下,兩個就喺車度傾咗成個鐘,Karen先返上樓。不過劈腿嘅嘢,好難密不透風。同新歡越行越密之際,亦發現正印Karen喺安心事件爆出時,喺社交網有感而發寫咗段心聲:「我覺得兩個人喺埋一齊,最重要係價值觀一樣,光是對於出軌定義都可以好唔一樣……再解釋落去都好似浪費自己時間,何必再花心機同精神落去。」

唔通正印開始聞到味?不過一日唔斷正,郭子豪會唔會好似處理醉駕咁,大話精上身?

立即下載《壹週刊》APP,精彩內容壹手掌握

下載連結: http://bit.ly/Next29App

如對會員訂閱制遇到任何問題或意見,你可以致電 2623 9985,或電郵聯絡客戶服務主任 cs@nextdigital.com.hk,我們定當盡力協助!