• 高調的宅男 - 方新俠
  • 2019-05-30    

 

17歲憑炒股擁千萬身家、29歲榮獲「全球華人傑出青年」的方新俠說話寸嘴、絕對高傲,近年積極行善到落後地區建學校,也算得上宅心仁厚;不過他一點也不低調,自稱方神開班教財技,出版漫畫自己做主角,「連登仔」說他收得貴、高調寸嘴兼自戀,但他坦言自己寸得起,更奉勸年青人最緊要有夢想、放遠眼界,將夢想變得有價值、有商機。

方新俠自幼家貧,年少時夢想就是賺錢,14歲隨家人赴美,讀書之餘不斷尋找致富之道,他認為自己17歲已坐擁千萬是意料之內,亦一早作好生涯規劃,「15至25歲吸收知識;25至35歲係拼博期;35至45歲建立家庭、享受生活;45歲搵個理想地方退休。」四年半前他選擇回流,因為本身熟悉香港股票及企業,認為自己在香港「爆出」的機會較大,同時亦想貢獻出生地。

回流短短四年半,他以少年股神姿態在財經界闖出名堂,創立的俠豐控股旗下現有十四家企業,瓣數多多。少年得志的典型故事,當然是「著名牌、揸辣跑、攬靚女、食好嘢」,但隨了著名牌一項,方新俠一概欠奉。訪問當日,傍晚七時才完結,但他時間表密麻麻,全日無米到肚,僅靠能量飲品撐住;衣著方面,件件名牌但清一色黑與白,貪方便不用花時間配襯;雖然擁有三架名車,但天天由司機接送,「我除咗喺屋企,就係喺公司,你喺街度幾乎無可能見到我,我亦唔會去夜店、遊船河等等,我想用多啲時間貢獻社會、做好我嘅企業……我完全係宅男。」尚有幾年就踏入建立家庭期,問方新俠有何計劃,他再啟動「宅男」mode:「首先要搵咗女朋友…」荀盤待沽,他的擇偶條件只得一項—異性,其餘隨緣。

對愛情隨緣,對事業則目標明確。方新俠指旗下一半企業,投資的行業包括服裝、電競,甚至是式微的漫畫業,這些投資非為賺錢,而是希望給予有才華、沒機會的年青人。另外,他亦著重教育,推出以小朋友為對象的投資桌上遊戲,「我研究咗一套遊戲俾小朋友,只要識加減乘除就可以學投資,同家長一齊玩,親之活動之餘,學習投資培養興趣,再逐步在市場上投資。」近年他積極行善,亦以教育為目標,出錢出力到貧困山區建校。

方新俠指,不少學生哥報讀他的投資班,更明言想做「下一個方新俠」,他願意將無師自通的炒股秘技傳授,希望香港年青人不要以入住公屋為目標,而是有能力走出公屋買私樓。他亦教導年青人要與家人保持良好關係,投資有斬獲亦要回饋社會。

他與身在美國的媽媽、姐姐雖然每年只見面一次,但關係十分密切,他指媽媽期望子女穩穩陣陣,大學畢業後找份好工安定生活,姐姐完美完成媽媽的期望,雖然媽媽覺得十多歲就創業的他很奇怪,但同時給予很大自由度。他指將來對子女都有不同要求,「生女無所謂,佢都要乜都俾佢,縱到佢公主咁都無問題,男仔會比較苛刻,自細要睇我嘅漫畫、投資書,識琴棋書畫,等佢發掘興趣,再灌輸佢一啲理念,點樣貢獻社會,有咩生存價值。」

對方新俠來說,與家人關係密切,能好好照顧他們的生活,讓他能無後顧之憂外闖。但在香港年青人要養活自己也不容易,單是追趕升不停的樓價、租金已「氣咳」,對此他深表認同,「我自己都無喺香港買樓,我都覺得香港啲樓好貴、唔合理,年青人如果要改變呢個文化,一定要跳出香港,到內地發展。」他坦言香港發展機會愈來愈少,而大灣區其他城市的生活及創業成本,遠比香港低,成功機會大得多。對於香港年青人抗拒北上發展,他語重心長:「世界不會因你而改變,你只可以改變自己…(佢哋)想留喺香港多數都係好感性嘅原因,鍾意香港, 唔想離開朋友、家人,但要闖一番事業,就要撇開感性,係等價交換。」他寄語年青人要有夢想、信念,再加以行動,以熱情和動力為夢想加入價值,轉化為商機。

最後談到股市、樓市走勢,方新俠認為香港樓價很難跌,但即使上升爆炸力亦不高,如果自住、要對沖貨幣,他認同何時都可以買,但投資就不建議。在大灣區內,他看好惠州樓市,他指惠州比較偏遠,但有很多綠化及再生能源,相對樓價已經上升的城市如肇興、佛山、中山等,更值得投資。股市方面,他認為要選擇與大灣區相關的股票,如建造業、原材料業;但要避買內銀股,「亦可以揀騰訊(700)、滙豐(005)等大型股,點解我講啲大圍嘢?我唔可以講細價股,因為我嘅說話會影響個市場。」他又指如果股民擔心股災,亦可投資反向ETF如:FI南方恆指(7300)。

回應網民負評

方新俠出名寸嘴,在網上不難發現網民對他的負評,今次方新俠決定親自回應各種負評。

負評一:「真係有料自己炒好過喇!佢開班係想cap 水啫!」

方新俠:「我收嘅學費係全港最高,但香港人好聰明,唔係開班就有人嚟,係有料先有人幾多錢都肯俾。香港人精打細算係全世界第一,上堂俾五千但賺五萬、十萬,覺得抵咪再返嚟囉。」

負評二:「佢啲貼士好伏,跟佢買蝕死!」

方新俠:「我都唔俾貼士嘅,可能係同行打手(抹黑),我只係俾個範圍學生,叫佢哋自己諗。如果講數據,我命中率超過八成,係全港最高,可能真係有人跟我買蝕過錢,但如果全港統計跟我蝕最少囉! 」

負評三:「佢唔係唔叻,但好寸囉!」

方新俠:「無可否認係嘅,我成日同學生講,你好寸唔係問題,最緊要寸得起! 有人覺得我自大;有人覺得我自信;有人想模仿我;有人覺得我鋒芒畢露、恃才傲物,我唔係聖人,我無辦法令所有人有共鳴,鍾意我就繼續鍾意,唔鍾意嘅希望至少唔好憎我。」

負評四:「出本漫畫吹捧自己,好自戀啫? 」

方新俠:「其實唔止漫畫,仲有投資書、愛情小說、手錶、服裝品牌,都係以F字行頭,但《方新俠漫畫》個名係漫畫家曹志豪決定,我有質疑過市場會唔會太窄?提議不如叫《炒股俠》,大眾啲、易賣啲,但佢本身係我FANS,話唔叫方新俠就唔畫......如果我自戀,我唔出漫畫出寫真喇!

撰文:阮加文