• 【拍得住古天樂張家輝】國語教父黎諾懿講煲冬瓜 唔睇字幕聽唔明
  • 2019-06-04    

 

大台新節目《如果這樣生活》,首集有黎諾懿遠赴雲南大理,體驗歸隱田園生活!黎諾懿仔細老婆嫩,咁快就諗定歸隱田園好似早咗啲,而且佢一個都市人,去到「荒郊野外」未必適應到。不過,佢喺節目中捉雞好輕鬆,似乎真係難佢唔到,唯一難到佢嘅相信就係言語不通,事關黎諾懿啲普通話拍得住古天樂、比得上張家輝,被譽為「國語教父」,奉行廣東話讀歪啲音就係煲冬瓜,莫講話當地人聽到一頭霧水呀,其實唔少香港觀眾昨晚都邊睇邊話佢講得差過節目入面個法國人。

黎諾懿都知自己煲冬瓜「了得」,一早喺IG先旨聲明:「此節目含有大量港普,希望大家聽得明。唔明唔緊要,當睇韓劇,有字幕的。」的確,係需要睇字幕,如果唔係,黎諾懿講嘅每隻字你都可能識,但總係串連唔埋,唔明佢咩意思,例如:「屍之,梨棟去棒豬chan罵?(司機,你懂去蟠曲村嗎?)」「姊些能痴的嗎send齋?(這些能吃的嗎現在?)」「狠艇,娣個微刀狠相yu本狠龜的擺些yumi。(很甜,這個味道很像日本很貴的白色玉米。)」

其實上述聽到攨晒頭嘅情況唔算多,唔係因為「國語教父」有時講得唔差,而係佢根本少講,多數都係後製廣東話聲音導航。所以,想再聽多啲可以笑下開心下,今晚(6月4日)第2集係最後機會喇,之後可能就會輪到袁文傑、李佳芯等人喇。

立即下載《壹週刊》APP,精彩內容壹手掌握

下載連結: http://bit.ly/Next29App

如對會員訂閱制遇到任何問題或意見,你可以致電 2623 9985,或電郵聯絡客戶服務主任 cs@nextdigital.com.hk,我們定當盡力協助!