• 【轉行做骨妹】簽100個騷做得1個 陳思齊離開無綫:打算結婚,點知嫁唔出
  • 2019-07-08    

 

2019年嘅香港小姐已經進行第二輪面試,大批騎呢參賽者未能晉級,而家算係有啲質素。仲記得00年參選港姐嘅陳思齊(前名叫陳凱怡)當年只得17歲,挾住「翻版朱玲玲」個朵成為大熱人馬,可惜,最後三甲不入。今日《蓋世寶訪問你》,就請咗陳思齊同大家聊聊天!



當時有傳你講咗句「邊個係朱玲玲?」,令本來大熱嘅你,結果三甲不入,件事係咪真㗎?陳思齊說:「其實講過呢句說話係真嘅,但關唔關呢件事而入唔到三甲呢,就應該唔關事,因為我的確唔係選港姐嘅材料。」點解咁講呢?「好明顯我唔係一個斯文、好乖,可以做親善大使嗰種女仔,著旗袍時經常俾保母喝住話我走光,叫我唔好行咁大步,例如有人叫我,就算著住旗袍,個衩開到上腰,我都會一步就擒上台,同埋又唔識得著高踭鞋,又唔識得化妝,其實我唔係一個好lady嘅女仔。同埋學歷係一個好大嘅問題,所以根本同呢句說話無關。」三甲不入會唔會好失望?「我鬆咗一口氣,因為我好怕當選之後唔識得點樣面對一切,所以如果當選對我嚟講,會係一個好大、好沉重嘅壓力,當然嗰一年我都得到一個豬肉獎,叫做「完美肌膚獎」,然後都要履行港姐職責,但唔係一個重責,感覺就相差好遠,其實都開心嘅。」



選港姐黑暗事

參選港姐期間,有冇咩嘢黑暗事情?例如批踭或者互相推撞?你身為大熱,會唔會俾人咁樣對待?「我唔知嗰啲算唔算係黑暗事情,我有試過俾人撞到,但我無諗對方係咪故意,不過啲衫褲鞋襪就會經常唔見。」咩嘢情況之下唔見?「可能大家都要除低外套埋位,但轉個頭就會唔見咗件褸。」最後有冇搵番?「通常都搵唔番,然後就會俾服裝姐姐鬧,成日都會俾人鬧。」



拍拖八年分手

選完港姐後,陳思齊係拍劇先,定係加入兒童節目?「先加入兒童節目,係星期六、日嘅節目,叫做《開心小跳豆》,同Henry哥哥合作嘅。本身做開旅遊節目,然後突然加入兒童節目,所有嘢都係好突然,無諗過之下就加入咗。我覺得自己好好彩,可以一步一步接觸唔同嘅嘢,然後至開始拍劇。」既然都覺得自己幾好彩,幾多工作,點解會突然過檔HKTV?「其實可能因為啲運氣已經用晒。因為去到咁上下嘅時候,我發覺自己喺呢間公司已經無咩突破,同埋年齡又比較尷尬,因為我唔係主角,就唔會係感情戲,又即將踏入三字頭,所以唔會再演妹妹角色,當你唔做妹妹嘅時候,又未可以做師奶,公司無咩工作安排,其實當時under show情況幾嚴重,所以自己覺得就算再續約,都好似去咗一個樽頸位,所以覺得要轉變吓。但當時我無諗過加入港視,而係打算結婚,點知嫁唔出。」

即係已經有個好固定嘅男友?「嗰時係嘅,點知離開TVB無耐就分手,對方唔係圈內人,之後就加入咗港視,咁啱嗰邊又唔可以成功開台,所以都無再繼續演出,然後去咗讀書。」當年點解分手?「因為我覺得唔開心,係我主動提出分手嘅,大概拍拖七、八年。」有曾經求婚?「佢開始問我結婚呢個問題嘅時候,佢唔問我都好哋哋,覺得嫁俾佢都無乜所謂,但當佢問我嘅時候,我就發覺唔係好想嫁。」點解呢?你都話自己好隨緣,咁緣份到,就應該繼續行落去嘛?「我就係忽然間覺得呢個唔係我嘅緣份,突然間醒咗,因為我脾氣太好,其實佢嘅脾氣都好好,所以我哋其實好唔夾。」兩個脾氣好嘅人就會唔夾?「應該話兩個人其實唔夾,但大家脾氣都好好,所以從來無提出過問題,會互相遷就,其實相處上大家都唔會好快樂,又無話唔開心,我哋好少嗌交。」七、八年感情轉為平淡其實都好合理?「其實我哋由頭到尾都係咁樣,因為大家性格都無乜嘢,所以變相係咁,但當我問佢娶我會唔會覺得好開心,佢個樣話俾我聽唔係囉,其實我應該唔係佢心目中想要嘅嗰種女孩子,只不過佢覺得咁多年,要俾番個名份我,覺得要為我嘅青春負責,我話唔使你負呢個責任,所以就分手。」



錯過入豪門的機會

做藝人嘅時候,係咪無受過尊重,或者聽過「你好叻」呢三個字?「其實做演員咁耐,好好彩我係有受到尊重嘅,但我通常只係聽到人哋讚我好靚,我就覺得好空殼花樽,即係我好無內涵啦,同埋可以擺幾耐吖?當我離開TVB時其實有諗過搵工,呢個至係我覺得最可怕嘅一件事,因為當要搵工填履歷嘅時候,我嘅履歷係咩嘢呢?識得演戲唔係一個履歷,識得扮靚都唔係一個履歷,識唱歌、跳舞……原來以前學嘅所有嘢都係轉唔到行,都係一件好廢嘅事,嗰啲技能都係無用嘅,我就覺得真係要讀書,要學番一門專業,令我覺得轉行都可以搵到食,可以維生嘅一個技能。因為我唔係有人照顧,仲已經分手,做唔成少奶奶,更加要靠自己嘅時候,變相更加要學一啲專業技能。」孭住香港小姐名銜,會唔會有途徑可以嫁得好少少?「我已經錯失咗嗰啲時間,因為做親善嗰一年其實會參加好多慈善舞會,會認識好多名流公子,但嗰時嘅自己完全唔明白,淨係會諗今日有咩嘢食,覺得個ball場好靚、有好多嘢食,然後只係好專心咁食嘢。同埋佢哋講嘅世界大事、財經大事我又聽唔明,淨係掛住食嘢,錯失咗嗰啲機會。」即係喺飯局中,食嘢係對你最重要?「係呀,基本上想約我去街嘅話,除咗食飯,其他原因都唔會約到。」



轉行做骨妹

陳思齊同無綫1年簽100個騷,點知最後做得1個,under show 99個,結果佢決定離開,轉行去做骨妹。而家身份係香薰治療師,過程係點樣?「好多人都會話,好聽啲就係治療師,其實都係骨妹啫,因為有時一啲痛症都需要特別嘅按摩手法,我都有研鑽呢方面知識。同埋如果情緒上,或者創傷後遺比較嚴重嘅客人,我都會用到催眠或者音樂治療,即係一啲樂器配合,或者深層次嘅催眠手法。」生意OK嗎?「應該點樣講呢?生意係好嘅,但其實唔係一件好事,我生意愈好,代表大家嘅煩惱愈多,所以我盡量希望處理好客人問題,唔使再返轉頭。」



攝錄:王志明、吳斯金

策劃:肥A

蓋世寶化妝及髮型:Albee(嫁妝)

立即下載《壹週刊》APP,精彩內容壹手掌握

下載連結: http://bit.ly/Next29App

如對會員訂閱制遇到任何問題或意見,你可以致電 2623 9985,或電郵聯絡客戶服務主任 cs@nextdigital.com.hk,我們定當盡力協助!