• 【老豆出節目仔享福】黎諾懿街市買餸搭枝波板糖 小春雞跟老竇出巡有食神
  • 2019-07-09    

 

黎諾懿一向受師奶觀眾喜愛,日前一家三口行街市買餸更受檔主歡迎,排隊集郵例行公事啦,而且老豆搵錢仔享福,買餸搭條蔥之餘,仲附送波板糖,囝囝小春雞一樣有著數!



39歲黎諾懿入行大大話話17年,真係無乜負面新聞,幕前形象風趣入屋,幕後又出名好相與,唔係嘅話新節目《懿想得到》又點請得郁咁多把炮嘉賓呢?鄭伊健、旦哥喎!兩大視后田蕊妮、李佳芯喎!仲有薛家燕從影以嚟首次「出浴」呢!連私底下每次偶遇佢,都係一家三口樂也融融,例如food court開餐、反轉嘉年華,有時更貼地行街市買餸,抵佢多街坊fans。呢日都唔例外,一向入慣廚嘅黎諾懿帶埋老婆、囝囝去買餸,2歲小春雞一向活潑好動,唔夠高但一樣落手落腳幫父母推購物車,賣力萌樣零舍趣緻。

小春雞有時都扭計要抱㗎,尤其係唔夠高睇魚魚嗰陣,距離遠咗少少睇唔真都即刻揈手踢腳呀,黎諾懿真係少啲手力都抱唔掂!好彩,老竇買海鮮可以搭枝波板糖,小春雞終於放過啲魚魚,而且下一站肉檔,話咁快手仔又多咗包紫菜,仲兩父子一齊被集郵添。諾懿入屋受歡迎,阿仔活潑可愛,集郵自然不過啦,仲好多檔主、街坊專登上前同佢兩父子打個招呼傾兩句添,特別係一位女士上前想同小春雞high five,點知小春雞嘅回應係大嗌一聲,之後仲怕羞擰埋一面,好搞笑。

BTW,買完餸離開,喺商場搞泊車期間,好動嘅小春雞又無時停,而且人仔細細原來好好力,大大道門佢都可以一掌推開,堅勁!

出嚟扎扎跳咗咁耐,係時候拖住嗲哋媽咪返屋企覺覺豬喇。

立即下載《壹週刊》APP,精彩內容壹手掌握

下載連結: http://bit.ly/Next29App

如對會員訂閱制遇到任何問題或意見,你可以致電 2623 9985,或電郵聯絡客戶服務主任 cs@nextdigital.com.hk,我們定當盡力協助!