• 【不怕被Uber打到】捉蚊大叔100萬起家 手持60的士牌信香港 :我一定唔會走
  • 2019-07-09    

 

香港地,炒股炒樓炒舖,的士牌照也有得炒,一個的士牌照價錢,已足夠買近期沙田第一城一個284呎單位。人稱「四哥」的石國強,就持有逾六十個的士牌照。不過,他不但沒有有錢人的架子,更「骨格精奇」。

這天,他表演捉蚊絕活,在公園內的草叢內捉蚊,不消一會兒,他的膠瓶內已有數隻飛來飛去的蚊隻,他一眼就看得出「蚊種」,「一點點白腳那些,可能是白紋伊蚊。」不怕被蚊咬?他一本正經道:「有時候我去到,蚊都會驚,唔敢咬我。我有抗體。」他的戰績是以1分鐘捉逾40隻蚊,甚至在2013年創立「香港捉蚊協會」,有十多名會員,自發收集蚊數據再向政府反映。

不但捉蚊了得,捉對時機投資也有一手。石國強考考記者,「買100萬元股票,如果升一成賺幾多? 同樣用100萬元,向銀行貸款買一架600萬元的士,升一成賺幾多?點解的士贏?因為佢槓桿,買大五倍。」

香港仔賣錶走私發跡


石國強家境富裕,父親開金舖,以為又是富二代一帆風順的故事,但是原來他當年離家出走,自立門戶。原本他也想靠父幹,不過,比他大五年的哥哥,比他更早參與父親生意,亦早就將生意包攬,令他無法「發圍」,憤而離開:「我諗住做好表現給爸爸哥哥睇,會開間錶舖俾我做。哥哥話啲錢攞晒去買貨冇錢。我就諗與其同你一世打工,不如自己出嚟,就同太太離開屋企,住喺板間房。」

他離家後第一份工作是做「行街仔」,向手錶廠取貨,再提著裝手錶的木板箱,行走各區向錶行推銷。如是者三年後,他終於賺到第一桶金,選擇在香港仔開錶舖,原因是海邊有大陸人揸大飛來港從事走私生意,他一晚就可賣三千隻錶。後來他改為開金舖,吸納更多內地生意外,而且有本地客源,因為漁民愛買金器。他在香港仔紮根多年,在2000年代更當選自由黨南區區議員。

槓桿炒的士:每年都送好多車俾我


十多年前有朋友推介他投資的士,而且不必「full pay」(全數付款),「如果借到銀行錢,銀碼會變大。譬如用一百萬,買一架六百萬的的士,如果升一成,賺幾多?六十萬元。如果無槓桿,買一百萬股票,升一成,賺幾多?十萬炸!」

石國強買了三架的士後不久便經歷沙士,儘管如此一年多後,每架的士升了30萬元。此時他發現原來的士升值,可向銀行翻按,就算該部的士未供完,仍可再借升值的相同數值,亦即是每架的士可再借30萬元,三架的士就總共可借多90萬元。

於是,他用這90萬元再買多一架的士,付30萬元首期後,再用剩下的60萬元供款,變相共有四架的士。其後不足一年,每架車又再升25萬元,他自豪道:「四架車咪升咗100萬囉,又可以買多兩三架,又剩返幾廿萬喺度,如此類推,每年都送好多車俾我。」

他表示十多年前金行難以借貸,「銀行唔會點信你?金,你拎走就無,是嗎?但係你買個車牌、買樓契,可以hold住唔俾你買賣,所以物業、車、地皮、商舖,就可以借到錢。」嚐過「錢揾錢」滋味後,他騰出更多營運金舖的資金,買賣的士及舖位。

「舖王」黎永滔也是其中一個向他「教路」的人。二人是相識了二、三十年的好友,「以前滔哥(黎永滔)爸爸喺香港仔做金舖,我嘅金鋪就係佢隔離。」問他是否黎永滔啟發他活用槓桿原理,他答:「都可以這麼說。」

「買架的士返嚟,十居奇九聽日都有租收,原因喺邊度?」由於政府自1998年起停發的士牌照,全港的士只有一萬八千架的士。的士牌價格最高峰2015年720萬元,不過Uber的出現,令近兩年的士牌價跌至五百幾萬元水平,據的士聯交所資料,的士牌價格上個月維持525萬元。揸住六十個的士牌的他,依然相信的士牌價只會有升無跌,皆因他認為政府為免加重已路面負荷,增加的士牌照可能性低。近月運輸及房屋局建議引入600輛專營的士,佔現時全港的士約3%,已引來的士團體抗議。

買舖揀多單邊


石國強又鑽研舖市投資,將屯門本為一間的舖位,劏成五間,他直言仍有再劏舖空間,「可以間到八間至十間。」舖位單邊位置越多,就有越多位置可騰出來作門口,以間隔多幾個舖位,「每間(舖位)收多一千蚊,十間就收多一萬蚊。」此外,他會留意舖位樓底是否夠高再建一層閣樓,用作擺貨,甚或居住用途,這又是升值潛力因素。

具生意頭腦的他,甚至將投資眼光放在農地上,他知道農地有建屋限制,就想到開牧場,既養羊又養牛,成為香港固有景點外的另類選擇,供旅行團來參觀,從中抽佣。他更將羊場及牛場分別開在米埔及沙頭角,而非放在同一牧場上。他坦白講:「如果今日學校來參觀牛場,如果睇埋羊,咁成日咪去得一個囉?咁就羊場一個、牛場一個,其他又一個,咁今年參加呢個,出年又參觀呢個,咁可以畀到好多錢囉!」

如今名成利就,問他會否仍恨當年父親、兄長沒有給他財政上的支援?他淡淡然道,「佢哋而家已經過咗世,但係始終人與人之間‥‥‥我成日講冇永遠敵人嘅。心胸廣闊啲OK㗎啦。」回望過去,「反而激勵咗我要做多啲生意,我唔會衰俾佢哋睇,做返個正式嘅、搵到錢嘅生意,將來可能搵錢多過你嘅。」

九七送中拒移民


在香港,因為送中條例而生的亂局不絕,不少中產人士籌謀移民,遠走高飛,問他有沒有這樣的打算,「九七年咪好多人移民嘅,我話『你去啦,你去移民啦!』走咗好多人,競爭係咪少咗?係咪對我有利?我一定要腳踏實地唔走。」他亦慶幸自己九七時不移民的決定:「好多去加拿大美國返嚟,買咗啲樓返嚟,而家想買返,都買唔到,所以站穩陣腳,其實全世界投資,最好都係投資香港,香港集中、人流多啲,商業化地方。」

撰文:邱嘉幸

攝錄:胡智堅、林志謙

立即下載《壹週刊》APP,精彩內容壹手掌握

下載連結: http://bit.ly/Next29App

如對會員訂閱制遇到任何問題或意見,你可以致電 2623 9985,或電郵聯絡客戶服務主任 cs@nextdigital.com.hk,我們定當盡力協助!