• 【中環人語】做隻貓、做隻狗仲好過做香港人
  • 2019-07-08    

 

宗菁華週一晨早7點半就收到一位老友電話。呢位50後半退休人士,家族三代喺香港搵食,一早睇通共產黨嘅本質不變。80年代中英前途談判已經把資產移到海外,儘管大陸經濟起飛,亦從不落叠投資返大陸。佢老哥手持的一本英國護照喺回歸前,英國政府「醒」俾香港一班精英嘅護身符。以下係呢位老香港對現時亂局嘅一些見地。特此與壹週刊讀者分享。



「暑假仲有成兩個月玩,呢班𡃁仔冇暑期工做,又冇暑期班上,上街遊行咪當暑期活動囉!嗰個張建宗同埋鄭若驊出個網誌『話』去接觸年青人,呢啲咪係講咗當做咗!林鄭就越來越鬼鼠,閉門去見班年青人,以前拆皇后碼頭嘅時候,或者佔中時同班學生領袖都公開會面啦!阿爺啱聽嘅就仆到去做,乜乜國歌法、國旗法、逃犯條例審議快到無影,嗰條動物福利嚴禁遺棄動物條bill都慢慢諮詢先至審議喇,真係好似古巨基首歌咁,做隻貓做隻狗…………仲好過做香港人呀。以前中央政策組都會搵駐港跨國機構總裁,全職入去做顧問,起碼有啲大財團國際視野、思維及意見俾到政府,好多嘢都可以有先見之明。依家揾埋啲毛都未生齊嘅富三代或者係啲撈唔起嘅人,俾到咩意見政府吖?好似老董嗰個團結基金,搵個做開層壓式推銷嘅人做總幹事(註:此總幹事鄭李錦芬曾在Amway任職34年) ,最叻可能係搞咩活動時,唔夠人咪call晒傳銷下線會員來撐場。另一副總幹事黃元山,雷曼出左事之後都冇嘢撈,坐係度咪當有份工打。宜家個行會,林鄭鍾意唔開會又得,冇規冇矩,大嶼山填海倒錢落鹹水海,完全冇multiplier effect,呢啲都係accounting嘅1O1,林鄭同班高官完全唔識經濟,寄望行會成員任志剛,搵大學教授開啲雞精班俾呢啲高官,幫佢哋惡補吓啲經濟學。」