• 【飛美出征爭獎】「細龍太」陳偉琪踩入樂壇 伯樂林健華:我睇中佢夠吉士
  • 2019-07-12    

 

「細龍太」陳偉琪上個月時靜靜雞參加一個名為「WCOPA」嘅世界表演藝術錦標賽,佢一口氣報咗四個項目,結果憑「細龍太」演技,及以豎琴自彈自唱,鋼琴演奏等,贏咗兩金一銀成功晉身決賽,今日(12/7)中午佢就飛去美國洛杉磯,進行為期近十日,同其他國家千幾名選手爭獎。

初賽時佢仲贏咗一個明日之星獎,從而獲得呢個比賽嘅中華區主席林健華力捧,打入樂壇。

對於陳偉琪,林健華話最初印象係辣。「有呀,都聽人講過《愛‧回家》嘅角色好突出,好巴渣。」

當日佢有咩表現,令林健華刮眼相看?「我特別欣賞好似Vicky呢一類嘅藝人。其實我覺得呢一行嘅人,係多才多藝,我覺得Vicky正正有呢種特性。同埋都要多謝佢屋企人從小栽培,但重點係在於佢真係夠吉士(勇氣),做呢一行嘅人,有時候真係要唔知醜、勇氣十足嘛﹗因為佢報咗好多項目,又彈奏、又彈唱、又modeling,仲要做戲,去到美國仲要為比賽進行拍攝工作,佢覺得瓣瓣都可以挑戰,我內心對呢份勇氣其實非常欽佩。」

細龍太入樂壇,林健華會為佢度身訂造歌曲,將細龍太形象徹

底改造。

出戰美國,喺一個國際舞台分勝負,細龍太有冇緊張到失眠?

「咁又無喎!不過發現體力真係透支,因為而家有好多工作,例如keep fit同埋不停練琴,練到手指頭起泡結繭,所以十隻手指都好慘。不過我覺得好好,因為其實一直都識得玩呢啲樂器,只係放埋一邊無用,好浪費,但今次參加比賽,好似俾一個目標去挑戰自己,的確係好大壓力,因為唔想令大家失望,唯有盡力做到最好。」

因出戰要暫離《愛.回家》,且歸家無期。陳偉琪話:「全部人都俾我好多鼓勵,例如丹爺,話我搞到我流鼻血,好搞笑;另外仲有豹哥(單立文),佢都有恭喜我。我好多謝一班演員,大家都叫我加油,「老公」(鄭世豪)都有叫我努力,攞多啲獎返嚟,佢哋好好。」

7月15日起 《壹週刊》只限升級壹會員閱覽
期待你繼續支持,讓我們與香港人一起撐下去!

詳情 http://bit.ly/2YBCug0