• 【非攻】相聲(黃秋生)
  • 2019-08-12    

 

寫專欄最唔好嘅地方,就係好似賣醃雞咁,永遠冇新鮮嘅;但係又有可能係燉牛尾,放幾日仲入味。

江山代有才人出,唔怪得黃子華要金盤啷口,周星馳近年都少拍戲,黃、周二人點叻,都係講下笑,娛樂下大衆,點及得而家啲喜劇巨匠,真作假時假亦真,無為有處有還無。以下兩位巨匠,一男一女,醃雞嘅好處就係唔駛講名,大家都知係邊個,兩個人講嘅笑話都差唔多,故稱之相聲。

一、 保護裝備,例如全套黑衣,眼罩,頭盔等等。

解讀:佢連全身 pad 都冇講,啲靚仔着得咁型,一定係軍用物資啦,pad 喎?pad 喎!英文喎!仲唔係CID、CIA、CCC 提供?以前周街有得賣嘅嘢,運動用品、工業用品、户外用品,估唔到而家成為軍用品。罐頭唔知係咪軍用物資呢?唔知嗰位女巨匠有冇黑色内衣鎖子甲呢?(諗下都想嘔 ,嘔咗先,一陣再寫。)

阿叔。嗰頂唔係頭盔呀,嗰啲叫安全帽,單車帽呀,防撞架咋,防唔到子彈㗎,頭盔係用「功夫龍」做㗎,功夫龍係乜?不恥下問啲後生啦,既然你覺得佢哋嘅裝備可媲美防暴裝備,不如建議下「暴警」(防暴警察之簡稱,絕無貶意)以後改着黑 Tee、戴安全帽、包保鮮紙,平好多。不過而家 laser pointer 都可以當激光鎗嘅年代,合桃點解唔可以係手榴彈呢?睇下啲精神分裂嘅人點樣話上帝同佢講叫佢做乜做物就知啦,好多神經病患殺人之後,都話上帝叫佢做㗎。

二、宣傳手法十分專業,識用 Telegram、Air Drop 同討論區。

解讀:睇起嚟,佢哋真係當啲後生仔同佢哋一樣係智障嘅,佢哋識用,一定係有個勁嘅大佬教佢哋,(聽講有個大智障連地鐵飛都唔識買,同我一樣。)呢個好勁又非常精密仲(隱形)嘅大佬我知係邊個,你哋快啲去拘捕佢啦,佢就係⋯⋯耶和華:萬神之神。

三、識向市民鞠躬道歉,唔相信如此高招。

解讀:佢哋咁諗一啲都唔出奇,因為佢哋根本冇呢個軟件,或者細個冇教養。小學時老師教,勇於認錯,勇於道歉,勇於改過。知恥近乎勇也。呢班老鬼第一冇勇氣,第二冇廉恥,道歉仲要鞠躬?高招呀高招!

四、通訊器材媲美暴警(?)

解讀:電話? 背囊?睇得二戰片多呀?咁真係有好多低 B,睇戲當真嘅,我細個都問,點解姜大衛死極都死唔去?下一齣戲佢又生勾勾嘅。

五、訓練地方係社區會堂、或者長洲。唔知啦。

解讀:終於有樣認無知嘞,如果喺社區會堂訓練暴徒,咁政府就係嗰個大佬囉,長洲嗰啲,係咪練緊搶包山咋?講完又話:「我唔知㗎,聽人講咋。」有冇睇過粤語長片呀?曹探長話:喂!嘢就可以亂食,說話唔可以亂講喎。

總結:年青人都係白痴,我一定叻過白痴,而家白痴叻過我,背後一定有個隱形人,要查出呢個隱形人,同證明呢個宇宙有神一樣,呢個係一個宗教問題,靠哂啲警察去查啦。

作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

9月2日起升級條件將更新 繼續每月撐壹仔 講真心話撐住我香港!