• 民間自發搞小學生乒乓球會 5年凝聚數百家庭
  • 2019-08-17    

 

隨著時代進步,網絡通訊已經不再是年輕人的專利,素未謀面的家長們在社交媒體組成一個個群組,交流各種資訊和心得。由一群義工家長組成的小乒會,家長們透過Whatsapp群組協調分工,舉辦過大大小小的乒乓球比賽。近幾年甚至加入常識問答、演講比賽和各種生涯規劃探訪活動,儼如一個俱樂部。

「院長」Suki爸當初也沒料到,一個乒乓球竟能凝聚過百個家庭,讓原本互不相識的家長、孩子能夠成為朋友,在生活的大小事上彼此照應。

義工變朋友 交流升學資訊

本身從事會計行業的張生是其中一個家長義工,負責管理小乒會財政,拍攝當日他同時兼任賽事的攝影師。「全部家長嘅性質都係義工,唔會有任何一毫子落過袋。」

一年前經朋友介紹加入小乒會,張生被Suki爸的滿腔熱誠所打動,決定加入義工行列,漸漸和其他義工家長變得熟絡。「我哋好多家長之間都有做朋友,好似傾心事,傾下啲日常嘅嘢,覺得生活有啲咩好辛苦,睇下有啲咩幫下手。」

他的兒子今年準備升中,兩夫婦面對五花百門的升學資訊,無從入手。「有幾位家長嘅子女都係啱啱升完中一,經過咗呢個階段,咁佢哋就share好多經驗話俾我哋知,你要喺幾時開始部署,幫個小朋友準備啲咩。」後來兒子超班的面試表現令他感到非常欣慰,最終亦順利入讀了一間不錯的學校。

打好波、讀好書、做好人

拍攝當日,小乒會的比賽在港灣道體育館舉行,參賽的孩子們都是滿臉笑容,沒有半點緊張氣氛。大家都不為輸贏,只是簡單地享受切磋球技的過程。記者順手拾起一個剛掉落的乒乓球,孩子還不斷「唔該前、唔該後」,禮貌非常。

Suki爸希望孩子們能在提升乒乓球技術的同時也在同儕相處時學會做人。「打乒乓波好多人都覺得一係贏、一係輸,咁其實我哋個宗旨就係一定要打好波、讀好書,做好人。」

來自不同學校的孩子因為乒乓球走到一起,社交圈子不再侷限於課室之內。義工家長莊太指,自己的8歲的兒子生性害羞,但在小乒會也能認識到一群好友,「打得好唔好冇問題嘅,最緊要佢打得開心,同埋一齊進步。佢識到有男有女,有高年班,而家有啲低年班嘅都一齊玩。」

張生指,由於兒子就讀的是女校,同學多數是女生,在校的朋友不算多。「入咗小乒會之後就發覺原來佢打波識到人都好開心,佢成日都Whatsapp、傾電話,講下啲漫畫、打機,即係男仔會講嘅嘢佢哋成日都會打電話、Whatsapp講,個人都開心咗。」

小乒會每年6月都會舉行一場旗艦慈善賽,Suki爸和義工們每次都經過一輪精挑細選甚至上門探訪,才選定受助機構。今年的慈善賽「風信子盃」籌得近12萬港元,全數捐予明愛風信子行動,幫助22歲以下的未婚年輕媽媽。

乒乓球比賽期間亦會加入遊戲環節,例如將桌上的玩偶用乒乓球擊落便可以贏得獎品,或者完整背誦一首唐詩宋詞便能獲得雪糕券等。為了證明「打波唔會影響讀書」,近年除乒乓球活動之外,小乒會也會舉辦「面試班」、「口才班」、常識問答比賽和演講比賽等,不時也會安排小朋友到不同職業場所參觀,讓孩子接觸了解不同類型的職業,發掘自己興趣所在。

院長的故事

院長Suki爸本身亦有正職,但為了小乒會的事務經常忙碌至深夜,光是相關的Whatsapp群組也有過百個。「好想停一停,但係都停唔到,因為小朋友嘅笑容。小朋友打完比賽又開心,義工嘅全程投入,我哋做搞手嘅都好難停到。」

除了有個乒乓球了得的大女Suki外,亦有一對孖生兒子。「大孖本身係有特殊需要,係發展遲緩嘅。講嘢或者發展其實比一般同年嘅小朋友其實都係遲好多,最高峰嘅時間係遲兩年。」

小乒會的家長對大孖百般照顧,看見大孖走過,都會和他聊天、逗他玩。Suki爸忙著主持賽事分身不暇,有家長還會帶嚷著肚子餓的大孖到附近餐廳吃東西。

今年3月的演講比賽中,大孖的表現讓Suki爸和太太又驚又喜,「佢讀得好順暢、好大聲、好有信心。媽咪都覺得其實助人自助,我哋小乒會幫人,其實幫緊自己個仔,我哋都係受益者。」奔波了一整天的Suki爸此刻忘記了自己的疲倦,「呢個就係無價嘅回報,都係我地兩公婆最難忘嘅事。」

撰文:官琳

攝影:梁正平

9月2日起升級條件將更新 繼續每月撐壹仔 講真心話撐住我香港!