• 【萬綺雯舊愛】廿四孝老婆麥景婷餵食 53歲呂頌賢凍齡有術
  • 2019-08-23    

 

呢個咪係呂頌賢?萬綺雯個舊情人?想當年,佢扮演嘅令狐沖係最符合金庸原著描述嘅,係經典中嘅經典。咬住個包入錶位,係咩玩法呢?等我哋回帶睇吓先!原來佢係同老婆麥景婷一齊,見到有錶位泊定架車,老婆好知佢心意,落車買定盒齋畀食齋食咗多年嘅呂頌賢。喺車嘆齋,嘆咗陣,佢忽然落車,再扮嘢拍打泊喺前面嘅私家車,哦,係friend嚟嘅,仲要係左軚掛有內地車牌,睇嚟係佢多年嚟喺內地工作識嘅內地老友。另一邊,麥景婷單拖去咗個人護理店舖買嘢,揀左揀右,又問吓店員,最後買咗啲潤喉枇杷膏、潤喉沖劑,老公陪佢放上車。然後兩公婆同內地老友入咗茶記吹水醫肚。

不過,講時講,曾經被喻為港版木村拓哉嘅佢,雖然佢而家已經53歲,但又真係keep得唔錯嘅!想當年,佢由亞視跳去無綫,人氣急升過,但係突然淡出,開過餐,又考潛水教練執照做專業嘅潛水教練,閒時拍吓內地電影同劇集,好少返香港。直到舊年,有人搵佢拍電影《某日某月》,佢客串做原島大地個老豆,仲係咁型嘅佢令人眼前一亮。點都好啦,做人最緊要開心,睇呂頌賢樂得清閒,身邊有個好老婆陪伴,已經好幸福快樂。

攝錄:蕭敬漁、陳亦龍

9月2日起升級條件將更新 繼續每月撐壹仔 講真心話撐住我香港!