• 【工作要緊婚事等等】陳炳銓拍《理想國》被讚做戲夠肉緊 事業有望追貼女友Ali
  • 2019-08-20    

 

陳炳銓同李佳芯呢一對經常被指「女尊男卑」,畢竟Ali已經係TVB視后、唔少網民心中嘅女神。至於陳炳銓,雖則Ali成日喺傳媒面前大讚男友有才華,不過……直到最近ViuTV大熱劇《理想國》,陳炳銓主演其中一個單元《千針百孔》,令好多觀眾出乎意料地讚:「陳炳銓啲戲OK喎!」睇嚟有望搵近同Ali嘅「距離」喇。

是咁的,《千針百孔》講述陳炳銓與女友(楊淇飾)拍拖10年終於要拉埋天窗。女友雖然認為二人喺相處上仍有不少問題,但都答應結婚。可惜,陳炳銓對婚禮嘅事一概少理,令女友壓力爆煲。為解決煩惱與壓力,女友選擇使用「失憶針」去消除部分影響自己情緒嘅記憶,後來啪針啪上癮出現副作用──部分已被消除嘅記憶浮面,女友記起自己曾經出軌。女友因為原諒唔到自己,喺婚禮前一日重提舊事,質問對方點解可以忍受戴綠帽,此時先發現原來陳炳銓都啪過針忘記咗呢段往事。

呢一集入面,陳炳銓好多時扮演一個好好先生,表情唔多,嚟嚟去去都係微笑、poker face,語氣口吻亦無乜大起大落。以為佢無乜表現機會啦,點知到咗同女友鬧大交一幕,陳炳銓七情上面,令網民話:「估唔到佢演技睇得吓。」「睇佢做戲好肉緊。」唔通多得Ali對戲、教路?話唔定喺屋企對得最多嘅就係嗰場親熱戲。另外,網民指硬係要搵嘢彈的話,就只有「佢演得太舞台劇feel,唔似拍劇」。咁陳炳銓又的確係做舞台劇演出先嘅。

陳炳銓開始被觀眾留意同欣賞,但自己同李佳芯都已近37歲,早前又大把新聞話Ali想養好身子準備結婚生仔,事業定結婚?陳炳銓出席《理想國》宣傳活動時話:「呢一步行緊去工作先,好緊要!大家都仲係搏殺期,尤其是依家佢(Ali)都發展得幾好。其實佢想做演員,佢都希望演技一直提升,有機會就要捉住先囉,呢個緊要啲,結婚無乜刻意去講。」

陳炳銓又被問到如果真係有「失憶針」,會否為保戀情而使用,佢斬釘截鐵咁答:「唔需要用,無嗰啲問題係唔會成長,某程度可以行得遠或進步都需要OVERCOME一啲問題,所以覺得反而唔用係啱。如果真係有問題,嗰啲問題始終會返嚟,一樣要處理佢,我相信兩個人選擇包容係多過失憶。」好似劇情咁戴綠帽都克服到、包容到?好難想像現實會有人咁「偉大」。

9月2日起升級條件將更新 繼續每月撐壹仔 講真心話撐住我香港!