• 【放棄搵人仔】內地從影14年為仔女回流 39歲譚俊彥:因為我係香港人
  • 2019-08-23    

 

近期電視播緊嘅《包青天之再起風雲》,入面做包青天嘅譚俊彥,呢日微服出巡,同老婆仔女,享受家庭樂。前排劇接劇咁拍,難得放假行街,譚俊彥同老婆一人抱一個,不知幾sweet!為人父母,幾時都係仔女行先,譚俊彥都唔例外,睇佢呢日帶住仔女去玩具反斗城買玩具就知啦!仔女好快就揀到心頭好,廿四孝老豆就梗係負責排隊畀錢啦!見老公抱住個仔,拖住個女嘅譚太好識做,幫老公拎住大大袋玩具,好體貼。兩公婆行經任何店舖都冇望過咁滯,似乎冇乜購物心情。咦,譚俊彥睇乜睇到笑瞇瞇,仲要停晒腳咁,哈,原來係女性內衣!佢仲叫埋老婆一齊睇添,明嘅明嘅,呢啲係夫妻間嘅情趣,正常事吖。譚太似乎好鍾意咁喎,行過咗又望轉頭幾次。

講番先,39歲嘅譚俊彥係大俠狄龍同演員陶敏明個仔,佢老婆係內地女演員任祉妍,兩個人14年合作拍內地劇《冰酒窩》時撻著,拍咗一年拖就結婚。婚後任祉妍息影,15年同17年分別生咗女兒譚晴及兒子譚杺。喺內地拍嘢拍咗14年嘅佢,為咗多啲夠仔女,結果4年前回流香港,簽約無綫。放棄搵人仔,譚俊彥覺得冇所謂,佢講過:「因為我係香港人,因為我想用廣東話拍戲,覺得自己生完小朋友,希望自己小朋友喺香港長大,所以基地就會搬返香港。錢呢,夠使咪得囉,唔識講吖,最緊要係養到小朋友,so far都養得吖,咁咪ok囉!」回想起喺內地工作嗰14年,譚俊彥話以前慣咗拍完戲返酒店,而家拍完戲可以返屋企好開心,累啲都冇所謂。除咗譚俊彥開心,相信狄龍同陶敏明都好開心,可以有多啲時間見個仔同孫仔女,幾時都話,一家人齊齊整整最快樂!

攝錄:李玄

9月2日起升級條件將更新 繼續每月撐壹仔 講真心話撐住我香港!