• 【非攻】學乜?(黃秋生)
  • 2019-08-20    

 

我經常懷疑,中國人到底去外國做乜?好多留學生,除咗讀書之外,好似從來對外面嘅文化冇乜興趣,除咗同自己同種打邊爐、食餃子、去唐人街之外,冇聽講有太多同外國朋友來往,亦冇對别人嘅文化產生任何好奇及學習。咁,做乜要出國?

好耐之前,我喺英國上課,一段日子過去,當然會惦掛中式食品,嗰陣每個課程中間,都相隔一兩星期,平日唐人街人多,揾位唔容易,唔使返學就可以下午去,實有位。

有日我入咗一間麵店,叫咗碗雲吞麵,當時店内得我一個客,員工都唔多個。當然,員工都係中國人,我坐坐下,見到有個員工好 Q 無聊咁,將塊面貼住向街嗰塊玻璃,向外望咗一段時間,忽然佢大聲叫佢一個同事,佢話:「喂!喂!阿陳,過嚟睇下,我發覺原來喺英國有車嘅都係中國人。」

我當時聽到佢咁講,差啲將啲麵喺鼻哥度噴翻出嚟。大佬呀!嗰度係倫敦唐人街咋,唔代表全英國㗎!當日嘅倫敦唐人街得兩條街仔,又細、又短、又窄,冇鬼佬揸車入去㗎,入親去多數係唐人。佢啲語氣好似發現宇宙嘅秘密,原來英國只有中國人有車㗎!即刻覺得身為中國人都幾威水吖,顯然好耐都無行出過唐人街,或者從機場到達唐人街之後,從來都冇?

我心諗,佢都幾可憐。無知之外,仲要威他人之水。李嘉誠有錢,關你鬼事咩?講到中國人三隻字,相信又有人話我歧視,其實佢哋對號入座,以為中國人就指係大陸人,到底佢哋知唔知全世界都有中國人? 「乜嘢人」同「邊度人」係兩個概念,可以係美國中國人,加拿大中國人,非洲中國人,唔一定係大陸中國人。自卑者覺得别人講乜都係話緊佢,自大者覺得人哋講乜都有佢份。

剛才又發生一件小事,最近好多國家都有人發起支持香港遊行,同時亦有内地人發動反對。喺多倫多就有群眾舉住五星去「反支港」。當佢哋聽到支持者叫 free Hong Kong(讓香港自由)之後,居然叫住 free China(讓中國自由)嘅口號去抗議。到底,佢哋知唔知自己叫乜?反對緊啲乜?廿為乜成日都會出現各種令人莫名其妙,哭笑不得嘅言行?去到歐美,就學下個 free字嘅意思啦唔該。

當然,以上所講,絕對不包括所有中國人、華人、唐人。



作者簡介:

黃秋生,字秋生、號秋生哥、影帝、黃哥、黄老師……等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

9月2日起升級條件將更新 繼續每月撐壹仔 講真心話撐住我香港!