• 【與林愷鈴首次合唱】王梓軒呷醋:佢同咁多人唱都未同過我唱
  • 2019-08-21    

 


王梓軒新歌《安全著陸》,其實係「引力三部曲」的第三部,今次梓軒約埋龔慈恩女兒林愷鈴(Ashley) crossover,由獨唱版改為合唱版,兩位合作無間,但合唱就第一次,雙方更互派高帽。

梓軒話:「Ashley係我『引力三部曲』頭兩部曲《寄居太虛》同《邊緣引力》嘅MV女主角,不過今次我哋唔係唱嗰兩隻歌,係唱第三部曲嘅《安全著陸》,因為《安全著陸》個MV我哋已經請唔起佢喇!如我哋所願,拍完個MV佢已經飛黃騰達,所以我哋只可以做一個Live session,表現佢另一方面嘅才華,同佢一齊彈唱,歡迎你返嚟!」

Ashley開心地話:「好開心可以同梓軒哥哥一齊再合作,我send咗好多message俾佢,希望可以同佢合作。」

梓軒一直有留意Ashley嘅演出,搵機會跟她合唱,梓軒話:「Ashley好得意,佢會拍啲音樂片!今次對佢嚟講好大壓力,因為要坐櫈,佢平時都係坐地下、攤喺梳化⋯⋯」

Ashley話:「成件事都好pro,平時喺屋企我都係擺部電話,彈一次就擺上網。」梓軒搞笑話:「即係好勁啦!」她立即推說:「No!唔係,我意思係平時好低成本好隨意咁拍⋯⋯」

聽到Ashley話隨意拍,梓軒即話:「已經咁動聽喇!所以Ashely一話唱歌,我梗係話好啦!佢同咁多人唱歌都未同我唱,有少少呷醋,有少少嬲呀!佢冇忘記唱歌嘅初心,仍然會勤於練習,喺佢身上見到以前自己嗰團火!」

Ashley話:「我好green,今次同你合作學到好多嘢,尤其唱歌方法,獲益良多!」

梓軒搞笑咁話:「佢揞住良心,揞住個肺即刻咳⋯⋯今次嘅crossover我哋好用心去練習,希望大家會鍾意啦!我就幾鍾意呢次嘅合作,Ashley好認真,唱live又幾好,所以我推薦咗Ashley做一個歌舞劇,邀請佢再同我一齊玩吓!」

9月2日起升級條件將更新 繼續每月撐壹仔 講真心話撐住我香港!