• 【包青天再起風雲】將大公無私演到一副林鄭般的不屑面口 被批史上最差
  • 2019-08-22    

 

包青天嘅劇集大把版本,但做到好似TVB《包青天再起風雲》咁,令觀眾對包拯產生反感,真係少見,事關有觀眾話佢面口硬係有啲「林鄭」。

以前睇包青天,就算包拯判案幾不近人情,無視百姓求情堅決處斬情有可原嘅犯人都好,觀眾最多只係同情,覺得惋惜。至於包大人,依然係公正嚴明、大公無私嘅存在,令人欽敬。

不過,日前陪長輩睇咗一陣《再起風雲》,譚俊彥飾演嘅包大人睇落硬係有種目中無人嘅冷血獨斷感,特別係當百姓跪低,連太師都卑躬懇請包大人法外開恩放過救人無數嘅神醫談懷谷(謝雪心飾)時,佢唔賣帳,仲一臉林鄭不屑嘅面孔,相當惹人厭。

之後百姓喺公堂外排排坐,掛埋橫額齊叫「放人」兼掟雞蛋,連公孫策(曹永廉飾)都勸「何必與天下人為敵」時,佢更加強硬,搬出一套「包拯從來秉公執法,無畏無懼。明日如期升堂,執行鍘刑」嘅說辭。嘩!作反呀?喺呢個敏感時候播啲咁似示威者喺警局外抗議嘅畫面。

睇嚟呢個包大人畀人感覺唔好,唔全部關譚俊彥事,只係自稱父母官但又漠視民意一意孤行呢點似足林鄭,而且情節畫面同示威活動類近,難免令觀眾感覺唔良好。

吖!順帶一提,包拯唔係十足777的,例如皇上出面為談懷谷求情,包拯夠膽死唔聽仲鬧:「估唔到連皇上都本末倒置!」777又點敢唔畀面小熊維尼呢。

9月2日起升級條件將更新 繼續每月撐壹仔 講真心話撐住我香港!