• 【感激張敬軒】容祖兒: 如果軒仔搵不到女朋友幫佢生仔 我可以做代母 !
  • 2019-08-22    

 


容祖兒pretty crazy演唱會第16場,今晚終於輪到大會星級調音師兼好朋友張敬軒登場。軒仔台上一番言論,搞到祖兒又喊又笑,最後更感動到自爆為了報答軒仔晚晚無條件照顧及付出,將來軒仔如果搵不到女朋友幫佢生仔,她可以做代母!

昨晚祖兒唱完《特別嘉賓》冇特別介紹軒仔,欺騙觀眾話:「你哋唔好以為每日都有嘉賓得㗎,我今日唱一首我好鐘意嘅歌。」然後就唱《黃色大門》,唱到一半舞台升起,張敬軒登場,觀兩人唱完《黃色大門》,祖兒奸笑話:「你對我大恩大德 沒齒難忘,但係我真係好想講,我好記得有一日,佢同我講:『唏!謝霆鋒真係好靚仔,哈哈哈……」,軒仔都笑住話:「冇辦法㗎呢啲……」祖祖並沒停口,「如果關智斌係靚仔,佢一定係最靚仔……」,觀眾狂笑起哄,軒仔反問:「你都講得啱,但為乜你唔講我個名呢?」祖兒就話:「咁你就係頂級絕世帥Guy男,大家唔覺得咩?畀啲反應來聽吓。」軒仔就鞠躬多謝各位善長仁翁日行一善。

祖兒繼續玩軒仔:「你知不知你靚喺邊?你靚喺個心度。」軒仔唯有頂番佢轉頭,「咁啱嘅?你都係呀!我覺得!」然後他從袋中抽出一張小咭片:「呢一張係我哋陪伴咗容祖兒咁多晚,佢後台身邊梳化服同事一齊簽畀你嘅一份小禮物。大家知唔知係佢這副瘦削身驅、咁大條裙入面包住背後,冇人睇到佢身上幾多傷,我有幸可以睇到。你平日著衫係『瀡』入去,好似啲馬路咁暢通。我喺後台見到佢好少布嘅時候。」祖兒馬上震驚問:「吓?乜你有入嚟咩?」軒仔就話:「我耐唔耐會『裝』吓,你唔好信啲嘢寫先得㗎,我會裝吓!」祖兒即刻大罵:「你無賴呀!」軒仔就安慰祖兒:「算啦,睇完都唔知睇到乜。」

軒仔再正經講:「大家留意吓,佢淨係腳範圍,每日貼膠布着演出高跟鞋,佢皮外傷、內傷……今日開騷前仲去針灸同睇骨科。我喺台底十幾晚,我都覺得容祖兒係值得所有最好嘢喺佢身上發生。祖兒喺show前好擔心唔可以將最好狀態帶上舞台到,佢怕令大家失望,我未見過一個artist,凌晨完show喉嚨重插住六枝針,就係為咗保証第二日有一個最好狀態見大家!」

祖兒聽到忍不住大滴大滴淚水流落,好感動:「點解會有個咁好嘅朋友?成件事唔關佢事,佢有好多嘢忙,又開餐廳,十一月又開自己個『啲打show』」軒仔紏正,「我係中樂團!『啲打』喺呢度行過少少就係。」

祖兒突然好嚴重咁話:「我諗過對佢最大報答。」軒仔:「唔使以身相許啦!」料不到祖兒爆出:「如果你需要一個人,將來識不到一個女朋友都好,我可以做代母,係泰國捐精,哈哈哈……」張敬軒都嚇一跳笑住話:「咁我泰國搵得啦!」祖兒叉腰反問:「做咩依家好失禮你咩?我差啲咩?」軒仔一額汗,「你啲基因……都好好,我覺得呢世珍惜做朋友緣份就夠㗎啦,咪第時我去你屋企,我應該叫你媽咪外母好,定Auntie好?有單身男士,真係可以上ig留吓言畀祖兒。」

然後兩人合唱《櫻花樹下》,軒仔更換上一件印有火龍果圖案的紅白色外套。火龍果姐上身,同祖兒再唱《Pretty Hungry》才離開。

9月2日起升級條件將更新 繼續每月撐壹仔 講真心話撐住我香港!