• 【Fact Check長者Fake News】有錢收美國撐口罩有大麻 抗爭青年:要幾無知先會咁諗!
  • 2019-08-23    

 

 逆權運動至今已兩個半月,年老藍絲謠言滿天飛,年輕黃絲被抹黑收錢示威、美國勢力入侵、抗爭者口罩有大麻,何韻詩及黄之鋒是越南裔。藍絲真心相信並廣傳的謠言,卻只令黃絲一笑置之,「我哋見到其他藍絲專頁,集會時會有飯食同車馬費,我哋都係自費行動,真係為香港,反觀佢哋就只係為一餐飯而出席集會」,90後阿軒邊笑邊答。

記者在路上隨便問接近退休年齡的市民,近乎清一色相信各種看似無稽的謠言,謠言來源大多是口耳相傳或來自微信朋友圈,「有啲嘢空穴來風,未必無因,有啲話(示威者收錢)1,000,有啲話800,有啲話2,000至3,000,有啲話5,000」,起碼有十名長者,告訴記者類近的答案。

這些消息從何而來呢?「朋友講」、「公園個個都知㗎啦」,為何朋友傳言便輕易相信呢?「係好熟嘅朋友,咁佢身邊嘅人有做呢樣嘢,可信性高啲!」

「(有無驚人呃你?)我唔信我朋友會咁做,係好老實嘅人。(驚唔驚佢哋都俾人呃?)咁佢身邊嘅人,仔女來的,點俾人呃,自己仔女都呃?(咁朋友仔女有無收錢?)我當然唔會問咁敏感嘅嘢啦。」每次記者與已屆退休之齡的受訪者訪談時,一問一答之間,往往發現他們大多只信任身邊友人的言傳,無論內容是真是假,皆抱着「我信佢,所以佢講嘅嘢係真」的心態,説時言之鑿鑿。

示威者紛紛無奈笑言,卻不認為是惡意,反而大多覺得只是無知,「我收錢就唔使坐喺度食壽司啦」,「有錢收嘅話,我哋應該唔使逼地鐵」,「係嘅話,我哋應該發咗達」。22歲的趙同學説,「其實純粹係佢哋無知,同埋唔想吸收而家發生緊嘅實況,因為佢哋太想追求收成期,太安於現況,為求穩定就可以拒絕思考,好多人都可以咁樣做。坦白講,我覺得應該唔會有惡意,比較多係拒絕吸收資訊」,藍絲長者生於有機會在香港往上爬的年代,慣於安逸,年輕人皆指與其説是惡意,倒不如説是代溝,沒有站在生於亂世一代的角度思考。

示威現場往往有人揮動美國旗,多名支持民主人士亦被藍絲指勾結美國勢力,「因為中美貿易戰,美國先利用香港做棋子」,「黎智英啊,李柱銘啊,嗰兩個咁熟,梗係同美國佬勾結啦,微信都有講啊」。整場逆權運動先後有6位年輕人以死明志,本身是情緒病患者的范同學表示生命無價,金錢收買不了人命,「當我連生命都覺得無乜價值嘅時候,我覺得自己做咗好有意義嘅事情,咁完全唔會係收咗錢」,「同埋如果我哋有收錢嘅話,中國大把錢,點解唔係畀番錢我哋,叫我哋唔好出嚟呢?其實我哋收錢呢個話題根本唔成立。」思緒清晰的年輕人反駁時,言語間更多的是無奈。

「口罩內有大麻,令到年輕人的示威行動越演越烈」,這種説法一直流傳在用微信的藍絲長者圈內,大多年輕黄絲一聽便大笑,第一句便笑説,「香港禁咗大麻,而且大麻貴,要幾荒謬先相信呢啲說話」。示威者阿軒説,一聽便知相信這説法的人沒有思考太多,「我真係唔知道點樣回應,如果要證實其實好容易,口罩咁基本隨處可見,執一個攞去化驗所驗吓,隨機抽驗咪可以指證囉」。

何韻詩和黄之鋒因支持逆權運動,亦不幸被製造輿論的機器看中,有不少內地YouTuber説二人是越南裔, 黃之鋒一聽便大喊「好無聊啊,哈哈!」,何韻詩只簡單笑說自己喜愛吃越南美食,長者藍絲們認真相信謠言,卻換來二人沒有太認真看待這些説法。90後范同學説,「其實好無聊,香港有好多唔同族裔嘅人,就算佢哋係唔係都好,同反送中事件都係無關痛癢」。

謠言滿天飛,藍絲長者語重心長地說,其實他們有些人只反對衝擊,如果和平示威的話,他們沒有太大意見。年代不同,代溝越大,近乎黄絲年輕人只輕輕回應,「 是你教我和平遊行沒用」,這句說話亦是7月1日,示威者衝入立法會後,寫在柱上的句子,和平遊行20年,卻甚麼也得不到。



採訪:梁佩珊

攝影:田俊

9月2日起升級條件將更新 繼續每月撐壹仔 講真心話撐住我香港!