• 【醉酒現形當街嘔】細龍太陳偉琪背男友情挑髮型師 借醉投懷送抱
  • 2019-09-04    

 

有大台波霸之稱嘅陳偉琪,因為演水性楊花嘅「細龍太」維肖維妙而出位。現實中,喺加拿大長大嘅佢,一樣風騷,最鍾意性感打扮,除咗有個拍咗三年拖嘅健身教練男友Billy,異性緣亦好強。

日前壹仔發現佢以性感戰衣,同髮型師Ryan約會。起初兩男一女三人行,不過其中一個異性朋友逗留一陣就走,剩下佢同髮型師Ryan之後,嚟料喇!

首先兩個人叫支香檳,摸吓……酒杯底啫!成個約會,細龍太啲電力冇斷過。酒精令人亂性,所以兩杯落肚後,兩個越坐越埋,細龍太亦主動進擊,向Ryan投懷送抱。

之後邊玩猜情尋,邊一杯酒兩份飲,close到唔介意大家啲口水。玩到high high地,細龍太陳偉琪直頭想成個人瞓落Ryan度。不過Ryan見喺公眾場合,始終有啲避忌,所以用手擋一擋,要佢坐番好。

之後埋單,飲大咗嘅細龍太忘記自己係藝人,公然繑住男友以外嘅男人行番去salon,話之途人眼望望。

同髮型師happy完,呢位醉娃要搵人執屍喇。呢個時候,正印Billy現身,被電召到場,負責湊佢返屋企。男友Billy先扶佢離開商廈,見女友醉到如爛泥根本行唔到去停車場,佢唯有交俾salon一個職員幫手睇住,佢去車場取車。

Salon職員好醒目,隨身帶住膠袋以備不時之需,果然細龍太等車期間要嘔吐。醉爆嘅佢,頭髮凌亂,時而低頭時而戙高腳坐,完全不顧儀態。五分鐘後,男友Billy將車駛到門口,行唔到直路嘅細龍太全程要人扶上車。男友專登撲出嚟接佢返家,實在體貼,希望細龍太會珍惜啦!

唔好以為兩個男人互不認識,光頭Billy雖然冇頭髮俾Ryan剪,但原來都幫佢做過model。

9月2日起升級條件將更新 繼續每月撐壹仔 講真心話撐住我香港!