• 【債主臨門 還有民安?】阮民安絕地翻身宣布開個唱 疑即遭債主追擊
  • 2019-09-07    

 

持續三個月的反送中運動,令曾被喻為「樂壇小強」嘅男子組合E-Kids成員,今年39歲的阮民安(Tommy),絕地翻身變亂世英雄,早前在銅鑼灣busking試水溫後,今日宣布會舉行「沒有國泰,還有民安2.0演唱會」。

佢手揸依家日日都會見到嘅防暴盾牌影海報,宣佈開個唱,並給全港學生免費入場,暫定10、11及12月嘅其中一個星期五舉行,不過場地未定,要視乎人數反應。

不過呢頭宣布開個唱,嗰頭佢嘅債主就追擊,有位網友向Tommy追討去年一月佢同E-Kids兩子喺旺角麥花臣舉行嘅演唱會,所欠下嘅化妝費。「原來,撐就值得支持;其實我一直都想低調處理,因我真係唔係一個要生事嘅人,慢慢見到不同人去支持…明白嘅,因為行咗出嚟係事實……演唱會做完了,我一直等待著開工後嘅人工,一直都未收到(一年半左右了);我一定不會願意為我工作的同事們陪我等,我自己已先出晒人工給他們,而呢個演唱會化妝部分嘅錢,這段日子一直左推右推,說會處理,但到現在還未處理…甚至最近終於同老闆作安排後會每個月咁還俾我,當然都係沒有這樣做過……Ekids嘅Tommy,請你出番你們2018年1月嘅兩場演唱會錢給我?謝謝你。」不過呢筆化妝費,其實係Tommy負責,還是主辦單位嘅問題?

債主浮面唔止一個,另一個係曾跟Tommy兩公婆係朋友嘅日本達人Amber, 都趁Tommy近排高調現身,公開追債。面對一個個債主蒲頭,Tommy唔知點處理!

講番佢個演唱會,佢喺facebook表示演唱會無大台,因大部份主辦單位都係深藍。他說:「「沒有國泰,還有民安2.0 演唱會」,正式召集!!!呢個Show今次會有埋英文名,The Title is “NO CX ,STILL HAVE TOMMY BOY 2.0 concert” Thank You !



呢個演唱會無任何大台(即係無主辦單位,因為大部分香港嘅演唱會主辦單位都係好藍嘅,道不同,不相為謀),所以我喺度希望大家今次可以大大力支持,俾佢地知道我地就係靠香港人都可以撐得起Tommy呢埸Show。而同時間我要公佈呢場Show,全香港小、中、大學大專生,係免費嘅!!!只要各學生可以出示有效學生證進行登記,當日就可以免費入場!(點樣登記,下面有詳細解釋)。 由6月9號到依家,呢個抗爭運動已經差不多成三個月,幾時會完,無人會知,因為一日未見到香港人要嘅結果,我地一日都唔會停!呢三個月入面我地一班手足、年輕人,為香港嘅未來犧性太多啦!



呢段時間,我收到好多唔同inbox 同我分享佢地嘅難題,有對香港絕望嘅,有想自殺嘅,有失戀嘅,有自身問題嘅,每一個我都好認真去聆聽佢地嘅故事同埋盡力去開解佢地,但每一次聽完之後我都會喺度諗...究竟我仲可以做d咩去幫大家呢?



有人叫我參選區議員,但呢樣嘢責任太大啦,我未有資格勝任!



但係喺呢個漫長嘅抗爭路上面,我覺得大家都需要有一個小出囗去減輕一下壓力,尤其係喺831我同大家喺銅鑼灣唱完歌之後,我感覺到大家好似搵到一刻嘅快樂(雖然喺唔夠十分鐘後港島又突然變天),咁我諗一個藝人喺香港有困境嘅時候就係需要發揮到令大家放鬆嘅功能,而大家對我有呢個訴求,所以我就直接衍生咗呢場演唱會出嚟,去回應大家嘅訴求。



不過呢個show有一個難以估計嘅問題就係

-究竟最後有幾多人登記嚟睇同買飛呢?



所以我同團隊決定先用十日(即由今晚午夜12時開始至到9月17日午夜12時止)去接受大家嘅登記同購票,再會用七日去點算同埋統計同決定演出場地,然後會喺9月30日之前公佈演出場地,同日期。(萬一book唔到場,100%會即時退票)



日期方面,我地喺點算總人數後會立即同埸地協商,演唱會會定喺10月、11月、12月呢三個月入面嘅其中一個星期五,呢個安排係因為唔希望影響到香港人每個周末嘅抗爭日程,如果萬一大家咁支持呢個show而令到人數有需要開超過一埸,嗰一埸我地只會安排向前褪,即係如果星期五埸full左,就會加一埸喺星期四,如果都full就會加一埸喺星期三,如此類推!」

+6

9月2日起升級條件將更新 繼續每月撐壹仔 講真心話撐住我香港!