• 【一小撮闊太不代表我】何超瓊代表闊太俱樂部 學何韻詩聯合國發言
  • 2019-09-09    

 

今年七十一歲美心大小姐伍淑清,最熱心喺扶持啲後輩「妹妹」,接棒展現愛國行動,係佢加持之下,今年五十五歲、同樣係大小姐嘅何超瓊以香港婦聯主席身份,學得歌手何韻詩準備到聯合國發言,早前已去信聯合國,指出香港一小撮激進分子並不代表750萬人嘅意見,咁呢位何家大小姐又代表幾多人呢?揭開婦聯會員資料統計,截至今年5月21日,會員人數有2472位,其中67名屬團體會員,即是乜乜婦女會、物物長者保健協會,炒埋一碟就聲稱有十萬會員。

呢個團體由家計會代表人物林貝聿嘉創立,宗旨之一係團結各界婦女,不過睇吓首席名譽會長、名譽會長之背景,可能宗旨改為「團結闊太及富豪女友」就更貼切,好似首席名譽會長包括炒樓、炒車位天后嘅廖創興身抱廖湯慧靄、霍英東三太霍馮堅妮、新鴻基地產太子女郭婉儀、賭王二房何超瓊阿媽藍瓊纓,以及曾憲梓老婆曾黃麗群等等,大劉嘅前度呂麗君都係名譽會長,不過唔好以為會長個個「生勾勾」,有啲已經仙遊,名正言順是「死人」會長,包括大劉阿媽劉葉淑婉以及小甜甜龔如心等等,藉此婦聯闊太俱樂部,名字得以流芳百世也!

撰文:宗菁華

9月2日起升級條件將更新 繼續每月撐壹仔 講真心話撐住我香港!