• 【不是廢青】高中生暑假野外求生 上山下海鍛鍊意志力
  • 2019-09-11    

 

過去三個月,一向被標籤為「唔捱得」的港孩搖身一變,成為「被選中的細路」,豬嘴、眼罩下一個一個稚嫩的面孔讓人心痛。本以為千禧後的孩子只愛玩抖音、喝喜茶,但經歷過這場浩劫,香港人都對這一代刮目相看。

在硝煙彌漫的七月,一群原本素未謀面的高中學生參加了香港外展訓練學校舉辦的十八日訓練課程,兩個多星期攀山涉水,遠征西貢、馬鞍山、東平洲等,除了挑戰自己及與隊友建立友誼,亦有機會反思自己的社會角色。

記者一連數天尾隨採訪的McKinley組員來自不同的學校,大家互不相識,課程開始的第一天小組的氣氛頗為冷淡,組員們都比較扭捏和安靜。

16歲的Yoyo身形嬌小,性格開朗外向,早前參加過五天的短期訓練課程後意猶未盡,於是再次報名一個更為艱鉅的課程,希望挑戰自己。與第一次參加的隊友相比,她顯得份外淡定,「比起緊張、擔心,我更加係期待。因為上次我都剩係去五日,今次一嚟就十八日,好想知道究竟會發生咩事。」

Parco現時17歲,性格沈穩的他在朋友強烈推薦下決定報名參加外展訓練,首次參與的他在課程首天有點緊張,只是期望在十八日內讓心靈獲得平靜。「最近都發生好多事,可以離開一下,俾自己放鬆下心情,同埋享受下身邊嘅環境,唔好用咁多電子產品。」

McKinley的導師Matt指,課程剛開始的兩三日屬於「訓練階段」,主要教授一些硬技能,例如怎樣使用救生衣、防浪裙、煮食器具,以及划艇技巧。「慢慢我哋再build up佢哋個team,等佢哋學唔同嘅嘢,譬如team work、leadership skills。」

划艇20公里幾乎虛脫

經過了訓練階段,組員就正式要面對地獄式的挑戰,從吉澳划獨木舟接近20公里到東平洲、在雨天背著十幾公斤的背囊行山、各人獨自在小島上生活一天...... Parco直言「咁大個仔都未試過捱咁耐」,對他而言最深刻的一天是划艇到東平洲的一天。「係十幾廿公里嘅路程,總共撐咗六個鐘。我哋早上撐,連午餐都冇食,就喺海上面食咗啲糖呀、能量條呀、餅乾個啲,之後就要捱落去。」

比划艇更辛苦、難度更高的是雨中行山。「我哋每人都揹住十幾kg嘅袋,好重,連正常行路都好難、好痛,背脊、膊頭個啲位都好痛。」當時天氣惡劣,山上的石路又濕又滑,Parco一行人需要步步為營,「每行十幾分鐘就要抖返兩三分鐘,係難過獨木舟好多。」

冇得沖涼 去廁所要「就地解決」

這段時間他們化身真正的野孩子,有時在島上或山上露營並沒有衛浴設備和廁所,他們就只得用一些俗稱「蛇仔粉」的爽身粉清潔身體,大小二便也要「就地解決」。「大小二便就...... 通常細就你身後嘅大海,但係如果大就可能自己匿埋角落頭,掘個窿搞掂佢。通常我哋會用紙巾,如果我哋用紙巾要自己帶返走,如果唔係會對個環境有污染。」

Yoyo最怕的不是沒地方洗澡和去廁所,反而是有一晚在浪茄灣的草地上紮營,「第二朝一起身我哋發覺啲煲呀剩呀全部都係螞蟻,啲螞蟻係多到好似成噼泥咁樣。」她用手比劃著蟻群的大小,似乎猶有餘悸,「除咗個啲爐具啦,仲要成個背囊又係,仲要個背囊個背脊個位穿咗個窿透氣,啲螞蟻會喺個窿度爬出黎。」

最想知出面發生咩事

與世隔絕的十八日裡,克警越趨失控,不但全港各區都有「催淚彈放題」,亦沒有停止過濫捕示威者甚至普通市民。Parco在課程的第一天曾希望能暫時脫離緊張的社會氣氛,讓自己喘一口氣,不過似乎事與願違。「心靈都唔算話特別平靜,因為雖然冇得同外界聯絡,但係因為經過一啲村莊,電視都會播外面嘅新聞,會特別吸引我想知外界嘅事囉。」

記者第二次到島上採訪拍攝時,這群年輕人不住追問過去一段時間發生什麼事、警方施放了多少催淚彈、拘捕了多少人、他們住的地區是否有「遭殃」...... 一個個問題讓記者應接不暇,即使拖著多疲憊的身軀,他們最關心的始終是反修例運動的進展。

發掘領袖才能 同時學懂珍惜

香港外展訓練學校社區項目主任Houso負責設計這個十八日的外展課程,他希望參加者能夠從中增強意志力和抗逆力,鍛鍊團隊合作精神,以及更加認識自己。

「最大嘅得著我覺得係挑戰到我自己。」Yoyo是一組人當中年紀最小的一個,但因為有參加外展訓練的經驗,這次搖身一變成為了小領袖。「我之前都唔覺得我自己係一個好帶領人嘅一個人,我內心成日覺得我係一個follower,係一個跟人指示做嘢嘅人,我真係冇諗過我去帶領人係真係ok。」

經過十八日的洗禮,Parco知道自己擁有的一切也不是必然,「我學識咗感恩,識感恩我哋所有攞到嘅嘢都係得來不易。例如係食物,我哋又試過冇乜水,水資源得返好少,我哋又體驗到水嘅珍貴。」

小組導師Matt認為艱苦的外展訓練讓學員更加自立,更清楚自己的目標,「社會上,究竟佢哋身處緊一個咩角色呢?或者佢哋可以為個社會做啲咩呢?佢哋可以出返去之後,同個課程裡面發生嘅事情一樣,可以點樣運用佢哋自理嘅能力或者佢哋解決問題嘅一啲方法,去達成佢哋一啲想為社會做到嘅事情。」

撰文:官琳

拍攝:鄭樹清

9月2日起升級條件將更新 繼續每月撐壹仔 講真心話撐住我香港!