• 【撞正大班球迷嗌時代革命】黃淑儀嚇到入後巷避走
  • 2019-09-12    

 

早兩晚,喺銅鑼灣見到Gigi姐好驚青咁走入橫街,原來佢見到有人大叫「光復香港 時代革命」,都啱嘅,呢排咁嘅時勢,點知會唔會又有防暴警員出黎周圍扑!

由早年專做媽咪角色,變成烹飪專家嘅黃淑儀Gigi姐,年初同大台完約之後,就幫ViuTV拍飲食節目,無再同大台拍。因為大台要Gigi姐細仔徐肇平簽長約,阿仔唔肯,結果《吾淑吾食》亦都開唔成。

反正71歲嘅Gigi姐,都係寓工作於興趣,拍唔成仲樂得清閒。好似早兩晚,就見到Gigi姐,同朋友喺銅鑼灣行街,點知撞成嗰晚係世界盃外圍賽,銅鑼灣人山人海,不過似乎嚇親Gigi姐喇,佢見到咁多人,同朋友一個箭步就轉左入橫巷。

雖然Gigi姐見慣大場面,但係見佢慌不擇路,係檔口之間係咁衝,連有路人同佢打招呼,佢hea應完就繼續急急腳走人,好彩最後Gigi姐都行返出大路,當堂定返晒,可以繼續行街街喇。

9月2日起升級條件將更新 繼續每月撐壹仔 講真心話撐住我香港!