• 【非攻】小學雞・劇本分析(黃秋生)
  • 2019-09-12    

 

呢幾個月有大量短片喺社交平台發送,其中呢條令我印象深刻。於是想用戲劇角度分析一下人物和對白。

大綱

晨早返學初中小朋友,被警察搜查隨身物品並攝錄,警察言詞威嚇同小朋友嘅理智回答,形成強烈對比。

時間

清晨,日出前。

地點

雨後的一條長街,港鐵站地面閘口。

人物

幾位初中小朋友,有男有女,另有拍攝中警員一名。

事件

學生被搜查隨身物品後、準備離開前,與警員間對話。

四、五個初中生喺一條長街中間嘅港鐵站地面閘口前階梯上收拾物品,明顯物品剛才被搜查過,其中一女生手中攞住一罐壓縮氣體樽,好似化妝水嗰隻。

所有學生都戴住口罩,露出一雙雙聰明機智嘅眼睛。畫面中睇唔到路上、牆上有任何塗汚,所以女生手上嗰罐就算係噴漆,都係用嚟做美術用,後來學校亦都證明喺咁用途。

好嘞,對話嚟嘞。

警員:「邊間學校㗎你哋?」(語氣當然係冇乜禮貌嗰隻,一聽就知到冇乜教養。)

女生:「你自己睇啦。」 (校服上有校徽。意思係:你冇觀察力㗎咩?同埋,冇你咁好氣。)

另一女生:「我冇嘢講,我太委屈啦真係。」 (精彩。「委屈」呢兩隻字,從一名十二、三歲嘅少女口中幽幽道出,真係有無比温柔而強大嘅力量。你條粉腸仲唔係恰細路女?)

女生嘗試解釋:「首先我哋做嘅嘢呢⋯⋯」

警員即時打斷佢嘅說話,好似好驚比佢講嘢咁:「唔好同我⋯⋯唔好同我講耶穌。」

(做乜佢緊張到講嘢口窒呢?佢怕乜呢?怕人同佢講耶穌?講道理?乜嘢東西怕人講耶穌呢?據我所知,流氓、無賴、黑社會都怕人同佢講耶穌,仲有一種:魔鬼。呢條友係邊種,我就唔知嘞,或者佢以為個細路女好關心佢,所以同佢講耶穌啦。 )

女生又話:「冇人同你講耶穌喎。」(呢下傷到自尊心嘞。冇人關心你呀!三唔識七!鬼同你講耶穌咩?)

於是,警員加強音量:「想唔要前途就出聲!」

(唔通警員係佢哋老豆?或係警員真實身分,其實係訓導主任?或係,恐嚇?佢可以令到班細路冇前途?)

女生好淡定咁話:「我哋冇做任何犯法嘢,點先?點先? 」

警員:「⋯⋯」(心諗:係囉,點先?而家先醒覺原來面前係一班細路,返學做勞作。)

最後,班細路施施然咁離開,走前留下兩句說話:「唉⋯⋯同你講都嘥氣,公海見啦阿伯。」

後記:我唔明,搜查一班初中細路,註定得個吉。點解做埋啲無聊嘢?自己過癮?濫用權力去恰細路,從而獲得日出前嘅快感,補償人生嘅挫敗?

無論如何,今次警員自取其辱,細路完勝。



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

9月2日起升級條件將更新 繼續每月撐壹仔 講真心話撐住我香港!