• 【俾男人拋棄後醒覺】李施嬅跟每個前度做番朋友:因為我唔會記住啲衰嘢
  • 2019-10-07    

 

大台奇幻劇《金宵大廈》成近日熱話,女主角李施嬅將舞廳大班「CoCo」的蒼桑,今生空姐「Alex」的孤單,跟她過往的情路閱歷接軌,演技變得有地氣。

「十年前嘅我會同佢(角色)相似,因為我成日都覺得愛情好苦。」李施嬅說。38歲,戀過圈內外嘅男人,所知的有入行首個男友鄧健泓,相戀六年,最後二人結束關係;11年傳與李乘德有過短暫情緣,此後這位「前度」成了今天「胡說八道」好姊妹胡杏兒的終身伴侶;14年戀上富商潘樹維,可惜兩年後又是分手告終。

錯愛數次,傷痕難免,她說選擇忘記。

「其實唔開心嘅嘢我唔係好記得,真係㗎!所以我可以同啲前度男友做朋友,因為衰嘢我完全忘記晒,剩係記得啲好嘢。

以前拍拖,都會同身邊朋友訴苦,同男友嗌完交好嬲,但隔咗一陣冇事。佢哋就會話:『咦!呢個人其實係咪唔啱你,點解你而家又同佢好好。』我話係咩?點解唔啱呀?佢之前唔係咁樣咩?哈哈,我唔記得咗,所以永遠都唔記得啲衰嘢,照計係一件好事,唔記仇嘛!唔會記住啲唔好嘅嘢囉。」

情路惡性循環,因過往總是戀上同一類型的男人。

「可能同我有啲執着,未放得低有關係。點解有啲人永遠會遇到同一類嘅男朋友,係因為佢哋永遠有一啲嘢未放得低,所以永遠都會遇番相同嘅人一齊。而我口中所講嘅執着,係自己嘅性格,性格真係可以改變好多嘢。以前因為性格,可能只鍾意某類型嘅人,而嗰類性格嘅人,會有某啲脾氣。」

分手紀錄,李施嬅總是主動告辭,唯一次被對方拋棄,才認真檢討自己一直失敗的癥結。

「以前拍拖,幸運嘅係大部分時間我都準備好,才提出分手。但有一次係有一個男人先拋棄我,我就好唔慣,點解會咁呢?我有咩問題呢?就開始發覺自己原來真係有好多問題,所以喺嗰一刻我就慢慢去尋找自己嘅問題,慢慢留意到自己嘅舉動、性格、缺點,我就努力地改善自己。

曾幾何時我會要求另一半好多嘢,其實係錯嘅!又唔懂得表達感恩,呢個係大問題。原來你去感激一個人嘅時候,你要講出聲,你要做出嚟俾人睇囉,嗰時就係唔識做呢啲嘢,令對方覺得我不懂感激。性格上可能我又比較執著,依家當然明白好多嘢放開才會得到,輕輕鬆鬆唔好要求咁多,放開去享受個過程,啲嘢就會fall into place!」女人,努力尋找適合的伴侶同時,有否也裝備好自己,成為別人合宜的一半。

《金宵大廈》的「阿蕭」,願意與她長相斯守,現實中這個他出現了嗎?

「我以前好鍾意拍拖,但而家我又冇乜所謂喎,因為我比以前獨立咗好多,我而家好嚮往自己嘅生活同工作。」脫單沒有,她沒給你直接答案,正如她在其他訪問講過,就算有拖拍,都會選擇包密、低調!

但如劇情般的「林老師」,在她身邊卻真有其人,被她拒愛的男人,現在成為她一世的守護者。

「以前都有一啲男人追我,但唔啱我拒絕咗,之後就會變成好朋友,就算佢哋之後已經結咗婚,或者有小朋友,關係仍然好好,佢哋依然好似一個天使喺我身邊,有需要時會幫我,喺我身邊扶持我。當然我都同佢哋嘅太太或仔女關係好好,呢啲男仔係由愛情嘅緣份開始,縱然唔適合,但都可以變成好想照顧嘅親人。」她口中「佢哋」,眾數,即使情路不平,但有眾數的「林老師」,李施嬅有點小幸運。

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情 https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料 https://t.me/nextmaghk

最新消息 https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情 https://s.nextmag.hk/e/Tssefy687Z