• 【假設性無罪一男戰四女】強暴王敏奕唔爽 梁漢文最受張慧儀挑逗
  • 2019-10-05    

 

梁漢文在ViuTV新劇《假設性無罪》,同時與四位靚女扯上關係,不單有強暴王敏奕場口,還有被張慧儀挑逗、色誘戲份,享盡艷福,羨煞旁人!不過,梁炳竟說沒有「爽」的感覺:「拍攝期間有記者朋友探班,已經話我好爽,有四位美女,而且每個或多或少都有啲親密場口。不過我都講過,今次係我首次拍呢類戲,以前聽其他男演員講其實唔係咁爽,當時我都會質疑。不過,輪到自己拍攝的時候,因為你唔會去諗嗰啲事,係真正工作中,原來真的唔會有嗰種感覺。」

沒有爽,也不尷尬,反而擔心,擔心拍攝強暴戲時弄花王敏奕塊面,影響了她拍婚照。誰知,好的不靈醜的靈!「我哋睇過劇本,都知道呢場強暴戲,唔係喺室內好舒服嘅環境,唔係有張床、梳化嗰種。所以我會諗,喺咁嘅情況下我哋會點樣做呢?同埋最擔心係整傷佢,不過又真係俾我諗中咗,掙扎時打到佢塊面,整花咗少少,好彩無咩大礙,如果唔係結婚時有咩問題就入晒我數。」梁炳說。

梁炳拍得擔心,王敏奕卻認為easy job:「對我嚟講比較容易,尤其嗰場戲我比較被動,因為俾你(梁炳)做主動。最重要係開拍咗個幾月,然後先至拍呢場(強暴)戲,變咗大家都好熟。同時嗰種厭惡感覺好容易就演到出嚟,因為嗰個環境,唔單只係我,所有人都好厭惡,係好熱、好焗,一間喺元朗嘅荒廢學校,大家都希望盡快完成拍攝,同埋最緊要安全,因為現場好多木碎,會驚整傷多過擔心尷尬。」

主動強曝王敏奕不享受,那麼被動地被張慧儀挑逗呢?梁炳立即心跳加速!他說:「同慧儀姐都多接觸,有一場戲交代番我同佢喺年輕時,因為醉酒而發生一夜情之外,其實好多佢自己想像嘅畫面,或者喺辦公室入面,因為好想挑逗我,所以都會有啲動作場口,喺辦公室入面同我有啲接觸。但對於我嚟講,因為真係無演過呢類型戲,不過都可以俾佢帶入嗰種氣氛。雖然只係拍戲,但因為已經入戲,突然有個上司,將自己最性感一面,喺好短距離之內對住你嘅時候,無論說話、眼神、身體,原來都會令你突然心跳加速!」

抗拒不了張慧儀可以理解,重點是如何向另一半交代!「交代或者備案呢個課題,其實我喺決定接拍嘅時候都有諗過。(王敏奕:你嘅角色的確需要向身邊人交代一下。)不過我諗應該點樣講呢?幾時講呢?到最後正式簽約落實,我都無講到,無備任何案。到拍攝期間,覺得不如唔好講喇,因為都已經開始咗,同埋都已經一齊咁多年,都只係一份工作啫。大概五日前收到剪輯好嘅trailer,我同佢兩個人食緊飯,心諗橫掂都係,就話俾佢聽出咗trailer,叫佢一齊睇。不過睇完trailer,嗰餐飯我都食得好安樂。」

交代問題上,王敏奕輕鬆得多,畢竟丈夫曾國祥是演員更是導演。「佢身為導演,會更加明白一位女演員會咁樣負責任,唔可以去到現場時諸多要求,例如話屋企人唔批准做呢樣嘢、朋友又唔俾做呢樣嘢,我覺得係雙方對工作嘅一份尊重。」

採訪:S.lo

攝錄:黃志明

撰文:Ethan

梁漢文Make up:Hetty Kwong, Hair:Moe@IL COLPO(On Lan Street,Central)

王敏奕Make up:King Yip@KingsMakeup, Hair:Ken Hui@ii Alchemy

+4

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情 https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料 https://t.me/nextmaghk

最新消息 https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情 https://s.nextmag.hk/e/Tssefy687Z