• 【經歷家道中落好硬淨】李施嬅離開大台無懼路難行:喺TVB時好似被點燈 唔使試鏡就有戲做
  • 2019-10-07    

 

《金宵大廈》有口碑,令拍了15年大台劇的李施嬅終於吐氣揚眉。等到一套代表作,但人已經不再屬於TVB。要問鼎視后,就算民意幾高,都可能欠缺一個「自己人」的重要元素而落空。

不過當日選擇離場,就意味她根本不再在意這裡一切。

「好多人都覺得會唔會好可惜呢,離開咗先有一套咁爆嘅戲。我反而覺得,好似《冬冬》咁離開咗冇人記得係好傷感,嗰一集都睇到我喊,但我而家離開TVB,大家對我都有個好好嘅回憶,係開心。

拍大台劇15年,終於有套代表作,但她年初已離開這樹蔭。
「 好多人都覺得會唔會好可惜呢,離開咗先有一套咁爆嘅戲,我反而得,而家離開TVB,大家對我都有個好好嘅回憶,係開心。」

續約後無乜劇拍 如其坐喺度不如走

其實我喺TVB最後一套唔係《金宵》,而係《法證先鋒4》,拍嘅時候其實都已經諗緊,我喺TVB呢最後嘅五年(因當時續約是五年前),都唔係拍咗好多劇,可能一年一部或者半部,客串性質,唔係我推劇喎!而係咁啱我續約後就無乜劇拍,令我覺得與其坐喺度都冇用㗎啦,不如試吓出去闖吓!於是飛去美國學戲,增值自己,跟住認識咗好多唔同嘅人,忽然間打開度門,俾我有機會喺外國發展,所以我拍《今宵大廈》嘅時候,其實已經半開咗另一道門,雖然嗰度門好模糊,但我會諗;『冇咗安全感,冇咗底薪,咁應該留喺TVB,定係點呢?』當時我覺得自己係時候要出去學多啲嘢,因為喺TVB做咗咁多戲,其實我係去到一個樽頸位,我好想進步,但唔知點樣可以進步。」
「 其實我喺TVB最後一套唔係《金宵》,而係《法證先鋒4》。」
「喺香港做演員係好幸運,因為我哋好似被點燈,唔需要去casting,每一次都係俾人搵,知道自己會做咩角色,仲要係戲份重,所以我都好感恩。」

我去外國casting嘅時候,終於有人reject我

今年初決定破釜沈舟,離出安全區,走向未知的領域闖一闖。三十幾歲人初嚐工作中被拒絕的感受。

「我去外國casting嘅時候,終於有人reject我,我覺得我要去爭取一啲我想要嘅嘢,仲要係有人會reject自己喎,忽然間發現自己原來有好多進步嘅空間,亦因為有人覺得我喺某個角色做得未夠好,推動我要更加努力。仲有啲casting,佢哋reject你係唔會話你知原因,即係佢哋唔會話你個樣唔似角色,或者你嘅聲,或者你嘅acting有問題,就好似你去追求異性,你去攞電話,然後不停打俾佢,但冇人覆你,你又唔知自己做錯乜嘢,感覺好似要你去發掘自己有乜嘢可以進步。」李施嬅說。
「 我續約後就無乜劇拍,令我覺得與其坐喺度都冇用㗎啦,不如試吓出去闖!」

喺TVB時好似被點燈 唔使試鏡就有戲做

飛美學戲期間,她參予了美國微電影《Once More》,之後憑此獲得《European Cinematography Awards》及《Los Angeles Film Awards》的最佳女主角獎項,成為雙料影后。看似好輕鬆,其實華人演員在外國,哽唔少檸檬。

「其實喺香港做演員係好幸運,因為我哋好似被點燈,唔需要去casting,每一次都係俾人搵,知道自己會做咩角色,仲要係戲份重,所以我都好感恩。但去到外國,你會被人reject,佢哋俾一個劇本我,但我完全唔知道呢個角色嘅前文後理,乜都唔知,要我自己去發揮,中就中,唔中就唔中,冇take 2,我就係搵緊呢樣嘢,一個難度幾高嘅挑戰,仲要係你每次去試鏡,可能係有幾千人同你爭一個機會,所以做演員真係要好正能量,面皮要夠厚,唔怕蝕底,因為每次試鏡我都冇錢收,仲要花好多時間去記劇本,去度角色,但未必有回報。

我好佩服喺外國為Hollywood dream而奮鬥嘅演員,因為佢哋日日可能做緊一啲侍應、便利店或超級市場收銀員嘅工作,但其實佢哋日日都鍛鍊緊,為夢想而奮鬥,呢樣嘢好啟發到我。」
03年李施嬅獲選為「最上鏡小姐」及「才藝小姐」。
在大台曾奪「女飛躍」及「我最喜愛角色」獎,過往與視后無緣的她,今次能否憑(金宵〉爭氣。

家道中落時我冇擔心 有手有腳係唔會餓死

李施嬅,出身家境富裕,7歲隨家人移民加拿大,返港選美時家住九肚山,後來父親經營的「雅達家電」於04年被迫清盤,欠下一億巨債,入娛圈翌年便經歷家道中落,當時她在大台的人工唔過一萬,但仍願意與哥哥一齊擔起養家重責,有指她的銀行戶口一度窮得淨下一蚊。「邊有咁誇,冇窮到得番一蚊,只係戶口存款淨番好少。不過當時生活有幾艱難我又唔係好記得,因為唔開心嘅嘢我唔會記住。

我覺得有手有腳嘅人係唔會餓死,亦都一定會生存到,係睇吓自己努唔努力,所以我亦都從來唔擔心自己任何嘢。
返港選美時家住九肚山, 後來父親經營的「雅達家電」於04年被迫清盤,欠下一億巨債,03年入娛圈翌年便經歷家道中落。

感激低潮時有鄧健泓扶持我

最低落嘅時間,身邊有好多人幫我,好似姨媽會平租,二千蚊租間房俾我住,仲要佢住嘅地方都幾靚㗎,所以我好感恩覺得永遠去到一啲struggle少少嘅時候,都會有人喺身邊幫我,唔會慘到冇屋住冇嘢食。另外一個人,會喺我身邊扶持我嘅,就係Patrick(鄧健泓),所以而家大家都係朋友,佢低潮嘅時間我亦都喺佢身邊,我覺得上天永遠都會俾我一啲angels,喺我身邊幫我,我冇嘢可以投訴。

反而我係擔心屋企人,因為我做呢一行,家人一啲唔開心嘅事要曝光,追訪我嘅屋企人,騷擾咗佢哋,令佢哋壓力更大,呢樣嘢我會更加擔心囉!其實我父母好踏實,唔係一定要榮華富貴,好似我媽咪,無論家境好時,抑或到而家,都係著緊十幾年前嘅衫,佢哋對生活要求好簡單,好樸素。」
入行不久跟鄧健泓拍拖,六年後分手,但他倆再見亦是好友。

為同父異母嘅妹妹交學費

父母早已離異,有報導指她當年家道中落後,還替爸爸供養同父異母的弟妹。

「我覺得屋企都俾咗我咁好嘅生活,咁好嘅童年成長,無憂無慮,咁到我可以自己賺錢,都想俾番多啲嘢屋企。我爸爸係一個好giving嘅人,我俾佢幾多錢,佢都會俾晒屋企。自己可能唔食都要將啲錢,買張機票俾身在外國嘅女兒,所以有段時間我直情同我嘅half sister(同父異母妹妹)講,你嘅學費,我不如直接幫你啦,因為如果我次次俾錢爸爸,佢都俾晒你哋,其實佢自己都冇錢,如果我控制到嘅嘢,我可以照顧咗你呢邊嘅時候,佢就有番少少錢使嘛。

而家我嘅half sister都好叻女,佢仲讀緊大學,但半工讀,完全唔需要我哋照顧,好生性,我都覺得佢非常好,而家我淨係養爸爸媽媽。」]



採訪:S.Lo

攝錄:黃志明

拍攝:Lawrence Wan

場地:Mioxpace (party room)

化妝及髮型:Jay Cheung

服裝:(Top) Maggie Marilyn /(Pants) Mayali

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情 https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料 https://t.me/nextmaghk

最新消息 https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情 https://s.nextmag.hk/e/Tssefy687Z