• 【非攻】續拆(黃秋生)
  • 2019-10-07    

 


最近發生嘅事情實在太多太快,思前想後係咪繼續分解《榮光》老翻歌詞,終於決定做事有始有終,唔好俾外在環境影響做人原則。

由此令我聯想到,可能好多人都會俾社會氛圍影響情緒及判斷,我寫篇嘢都咁難,莫講話日常生活,希望各位盡量冷靜,有乜事,坐低食支煙(呢個只係形容,唔係真係叫大家食煙,坐底飲杯茶都得) 盡量唔好失去理智。

「盼和平不需詛咒」真係唔知佢指嘅對象係邊個?好似話緊自己咁,如果黑警死全家、七婆快啲死係詛咒,咁臭雞、曱甴係咪詛咒?冇理由話人哋講嘅就係詛咒,自己講嘅就唔係㗎?佢哋講到自己咁正氣,文天祥咁。一邊咒,一邊話不需詛咒,精神分裂。

「何以你講就是訴求」何以你講嘅唔係訴求呢?因為你講嘅根本唔係訴求,你只係禁止别人訴求。訴求係加數,由零到一,唔畀人爭取呢個加一,係禁止或反對訴求,反對訴求唔係訴求。正如反對改變唔係改變一樣。

「何解掟石頭又不准追究」佢哋真係好叻偷換概念,冇人話不准追究,而係雙方一起追究,所以要求成立獨立調查委員會,而家反對追究嘅係政府,權力喺佢手上,所以只有佢追究你,你唔可以追究佢。試下一齊追究,敢唔敢?

「要自由不必批鬥」要自由?禁止遊行係自由?禁止載口罩係自由?而家一家人食完飯落街行下都要趕走係自由?不批鬥?國泰事件、對學校加諸壓力、向醫院、記者、社工、議員施以不合理要求唔係批鬥?批鬥係乜?批鬥係喺批評嘅時候先定罪名,例如我話呢首歌詞係曲線支持港獨、分裂國家、隨便羅織罪名,就係批鬥;但我無,我而家對呢首歌詞純係批評。明冇?

「是你日夜茫然破壞」 又係「是你」,咁「你」呢?打爛玻璃、放火,固然係破壞,但係破壞法理制度,先立法後審批,違反通例,隨意執法,難道就唔係破壞?打死物係暴力,打人唔係?做官要做大,千祈咪做拉,道理你啱哂,說話佢講埋。

我諗都係唔夠空間拆解全首歌詞嘞,呢首歌詞其實寫得唔差,只係表達對象模糊不清,都唔知佢有心定無意,曲線定直射,大家睇嘅時候(大概冇乜人唱㗎啦),不妨將個對象換成對方,效果非常反彈。

最新情况,一波未平,一波又起。林鄭妳想點呢?想平亂定想亂?



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情: https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料: https://t.me/nextmaghk

最新消息: https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情: https://s.nextmag.hk/e/Tssefy687Z