• 【唔介意三人行?】明知男友唔甩7年正印 廖碧兒挑機做小三翻撻盧啟賢
  • 2019-10-11    

 

40歲嘅廖碧兒舊年被爆搭上傳聞話係富二代嘅失婚男盧啟賢(Calvin),男方有個女,被起底住山頂,又話係做投資生意,不過,就冇咩實質資料顯示佢係富二代。呢頭高調宣布拍拖,嗰頭Calvin被踢爆有個拍拖7年嘅泰妹女友Nina,女方就真係富二代喇,有根有據係泰國電訊公司嘅太子女。被指為第三者嘅廖碧兒,轉個頭又宣布分手,好戲劇化,不過,好戲而家先上演。



分手唔夠半年復合

話就話分手,唔使半年,廖碧兒同Calvin就復合喇,只係佢哋今次低調進行,唔似舊年咁高調。上個月,廖碧兒同Calvin齊齊去完法國,不過佢哋醒咗,前後腳上機,坐就一齊坐。對半島情有獨鍾嘅Calvin,翻撻後繼續帶廖碧兒去半島開餐,仲會同個餐廳經理齊齊影合照留念。Calvin生日,身為女友嘅廖碧兒被人影到佢哋撐枱腳食lunch慶祝,佢回應話同朋友食飯,唔好咁敏感。Ok,食完lunch慶祝,夜晚又同其他朋友繼續同Calvin食生日飯,仲要攬到實一實,成個女主人咁,係唔係復合,大家心照啦。廖碧兒同Calvin復合,唔通正印泰妹已經被KO咗?錯錯錯,Calvin冇同Nina分手,仲要每隔一個星期就會飛去泰國會Nina。



三個齊戴情侶手鈪

難得嘅係廖碧兒唔介意同人share男友,仲唔介意三人行!所謂嘅三人行,係三個戴住一樣嘅情侶手鈪,出post仲有一個三人齊用嘅hashtag(#thoseintheknowwillappreciate),兩女一男係咩玩法?明知Calvin有個拍拖7年嘅Nina,廖碧兒仲要叉番隻腳入去,仲要同正印tag埋同一個hashtag,呢吓挑機,小三廖碧兒果然係辣。最有問題嘅,唔只廖碧兒,Calvin呢個男人又有幾好呢?有正印女友,仲翻撻前度!據知孭住個傳聞係富二代外號嘅佢,成日四圍溝女,廖碧兒今日接受三人行,唔知幾時會變四、五、六人行呢?

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情 https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料 https://t.me/nextmaghk

最新消息 https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情 https://s.nextmag.hk/e/Tssefy687Z