• 【唔做護旗手!】孖張紋嘉賣大閘蟹賺錢 鄧穎芝:有手有腳唔會餓死
  • 2019-10-15    

 

鄧穎芝上星期喺個人社交平台度,公開同大陸AGENT割蓆,唔做護旗手,同港人同一陣線。入行15年,鄧穎芝遇上嘅機會唔多,不過,佢冇放棄,為咗生活,仲同老友張紋嘉(Hotcha成員之一,Crystal)夾份做生意!



有其他藝人寄賣

呢日,我哋就先直擊佢哋嘅二手衫店,一開門就見到鄧穎芝,佢話:「今次係我哋第一次夾份做生意,其實點解會有呢個構思,就係因為呢個女人,佢有好多嘢,其實我都有好多嘢!」Crystal就話:「其實本身係因為我有好多唔知點樣處理嘅衫,然後又大屋搬細屋,所以想搵個空間放置自己物品,於是租咗一個地方,之後我同佢不斷擺嘢,最後發覺放最多嘅就係衫。」除咗佢哋兩個嘅衫,仲有其他藝人嘅,鄧穎芝話:「同埋我哋發現啲衫放咗半年,到最後都唔會再著,不如賣咗佢,但淨係我哋兩個嘅衫又唔夠,所以就開始問身邊藝人朋友,提議一齊賣二手衫。最初搵咗梁靖琪Toby、傅佩嘉、劉威煌、Sophie,仲有其他KOL。有好多藝人都好有興趣,話屋企有好多衫可以拎嚟寄賣,所以就促成呢間二手衫店嘅出現。」



賣蟹成日計錯數

除咗合作賣二手衫外,鄧穎芝同Crystal連大閘蟹都唔放過,只要有錢賺,佢哋都會做,唔會怕辛苦!鄧穎芝笑住講:「我哋而家每日就係喺電話不停幫客人加單、接單,我啱啱接咗訂單,係七隻六兩重嘅大公蟹。」Crystal話:「我而家賣緊廣告,分享緊限時動態,因為擒日有客人傳相返嚟,所以我就分享一下。」鄧穎芝又話:「最麻煩係要即時計好總數畀客人,因為我計數方面真係好差,所以經常計錯數,要客人掉轉話番俾我知,真係唔好意思。」



兩個女仔自己搬貨

今日佢哋去pack蟹前,先去拎外賣包裝嘅貨,兩個女仔為咗慳錢,自己做埋搬運,少啲力都唔掂!鄧穎芝講:「手頭上嘅係包裝用品,因為我哋覺得貨品無包裝係唔靚嘅。」Crystal補充:「所以要花啲心機。」一路講一路行,鄧穎芝說:「未有呢啲之前都只係用膠袋裝住,因為咁樣其實唔係好雅觀,所以專誠訂咗一啲包裝袋,不過今日未用得住,等整理好之後就可以用。」



上工場pack蟹

收完貨,佢兩個就直踩上批發蟹畀佢哋供應商工場,準備開工做執蟹妹!鄧穎芝邊講邊收蟹,佢話:「每日都有啲訂單,老闆會執好畀我哋,然後我哋會自己分好每個客人嘅訂單。呢包係我妹妹嘅。因為咁樣其實唔係好雅觀,所以專誠訂咗一啲包裝袋,不過今日未用得住,等整理好之後就可以用。我哋每日嘅行程就係返嚟執蟹,包裝好,自己唔得閒就會搵貨車送貨。如果得閒,好似今日咁樣,就會由我親自送貨畀買蟹嘅朋友。今日要去屯門、元朗、青衣,之後過海去灣仔、杏花邨,如果要call車可以搵我。」



做其他副業堅持音樂夢

兩個女仔,為咗堅持音樂夢,keep住做唔同嘅副業,支持自己行落去,值得嗎?

鄧穎芝認真咁答:「我都覺得幾難行,尤其是喺香港。同埋有時候好俾心機去做自己覺得好正、好鍾意嘅工作,但得到嘅反應可能係問你點解仲唱歌?可能會有啲負面感覺,都會唔開心,就會諗吓係咪應該繼續,其實堅持係咪錯呢?不過我覺得隨遇而安啦,做到嘅就繼續做,做唔到咪先做其他工作,不過都唔會放棄嘅。」而Crystal就話:「都會聽到人話你仲唱歌?不過我會覺得有咩問題,本身都係唱歌出身,就算係組合,都係歌星身份嘛,我仲唱歌係好正常嘅事。不過其他人就會覺得,點解仲要浪費心機,都唔會有人聽,或者唔好掙扎求存,即係會有啲咁嘅聲音。」聽到人哋咁講,鄧穎芝話會覺得好唔開心,呢樣始終係自己最鍾意嘅工作。而Crystal就話:「不過都無辦法,始終環境都有好大影響,大家又唔係好聽廣東歌,喺現今樂壇,唔計天后級,就算我哋呢一代做到好top嘅,其實機會都唔係好似以前咁多,所以我哋會更加吃力。」



有手有腳唔會餓死

要做其他副業,藝人呢個身份會唔會為佢哋帶嚟好處,定係一個包袱呢?鄧穎芝講:「其實一直都有嘗試以藝人身份接觸不同範疇,因為之前考取健身教練牌,又做健身教練,因為入行十幾年,近幾年又無簽經理人公司,所以大部分時間都唔係好多工作,手停口停,所以有手有腳唔會餓死嘅大前提,就係要另外搵工作,希望喺等緊工作來臨嘅時候,都可以充實一下自己,所以都有考取教練牌,又做吓二手衫店,我覺得咁樣生活會比較充實。」Crystal:「之前都有做自己喜歡嘅手作,因為經常有個心態,就係自己鍾意先至有心機去做,所以有段時間做吓手作,最近幾年就比較多做幕後工作,例如舞台劇監製,或者寫作。因為幕前工作始終比較被動,而幕後工作例如監製,自己能夠創造一啲工作,就係另一方面嘅嘗試,或者創造自己嘅機會。但其實真係好辛苦,因為做咗藝人咁多年,好少理會文件同管理方面嘅事情,當要面對嘅時候就覺得好難處理,而家都一直學習緊點樣做一個好嘅製作人。」最後,鄧穎芝說:「另外我覺得由藝人衍生其他不同生意嘅好處就係,始終喺呢一行咁耐時間,自己都已經十幾年,可以運用到不同人脈關係,認識得比較多人,所以圈子會比較大,其實都係有幫助。」



採訪:肥A

攝錄:黃志明

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情 https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料 https://t.me/nextmaghk

最新消息 https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情 https://s.nextmag.hk/e/Tssefy687Z