• 【非攻】又一單(黃秋生)
  • 2019-10-14    

 

假若有人話,北極熊被冷氣吹到傷風,你會點睇?唔好同我講嗰個係超級冷氣或者隻熊身體弱呢啲廢話,而家佢哋就係咁,廢話做理由,肉麻當有趣。

十五歲少女浮屍引起關注,佢哋 ── 我唔想再用警察呢個詞稱呼佢哋,因為已經唔係好準確,用佢哋比較適合佢哋啲 ── 於是「佢哋」又出嚟吹水,漏洞百出,欲蓋彌彰。

佢哋話,個女仔在九月十九號同朋友通電話,話自己返緊屋企,當晚被學校 CCTV 拍到佢返學校,放低電話及私人物品後,赤腳行向海濱公園方向。咁即係點呀?赤腳行向海濱方向就係自殺呀?你哋點查案㗎?業餘㗎?我哋試下從兩個相反方向分析下呢件事。

正方:假設個女仔真係去自殺,動機呢?點解將啲私人物品放返學校,仲要放喺畀人見到嘅當眼地方?點解唔放喺海邊同衣服一齊?係嘞!衣服呢?鞋呢?做乜又赤腳回校?屍體全裸,如果自殺,衣服理應留喺海邊,點解佢哋冇提過去海邊調查嘅?莫非已經知道衣服喺邊?外衣内衣留喺海邊,咁奇怪嘅畫面,冇理由冇人見到啩?又冇理由佢哋無呼籲「有冇市民見到」囉?個女仔係游泳健兒,選擇一個咁嘅方法自殺?北極熊選擇一個凍死嘅方法自殺咁奇?大話精都唔會選擇講真話啦。

反方:假設個女仔係被殺嘅,咁即係當日返學校放低物品嘅唔係佢(有無呢條 CCTV 或者影唔影到人都未知,影片從來冇公開過)假設有,咁嗰個回校嘅一定喺扮嘅(佢哋最近扮演咁叻)點解冇着鞋?因為衣服易扮鞋難扮,而且衣服一定係全黑,鞋容易認得出,亦有可能扮演者腳大着唔落佢對鞋。我比較偏向有人扮佢回校,如果唔係佢哋唔會特別提到冇着鞋呢一點,所以鞋係一個重點。

為何又將物品放喺當眼地方呢?因為希望被人盡快揾到,證明佢返過學校。如果真係在十九號晚放低嘅,咁即係十九號中午已經遇害,所以要問清楚,物品係幾號俾人見到嘅。衣服又去咗邊呢?如果真係被殺,咁就合理嘞!衣服上有 DNA 所以要除晒,從呢點睇嚟,殺人者係專業嘅,如果你班友係知情,你班契弟就係殺人犯,打份工變殺人犯,自己諗啦。

溺斃屍體無可能兩日浮上嚟,上次講過嘞(文章連結: https://s.nextmag.hk/e/Zwqsdw0EF0 )仲有水流,將軍澳水流唔係向油塘嘅,反之係油塘水流往外向將軍澳。法醫解剖完都話未有結論,未知死因 (真係溺斃點會唔知死因呀?法醫唔想參與啫) 你班友仔就話死因無可疑,點解咁肯定無可疑?講嘢又懶醒,乜嘢冇表面傷痕啫,咩都睇表面唔駛解剖啦,白痴,而且有冇都無人知啦!而家你哋誠信破產,聽你哋講嘢,係聽下有冇漏洞咋。諗下自己做過啲乜啦,我唔信佢哋當中連一個有良知嘅人都無。

P.S.

佢哋話,懷疑死者係被警方殺害嘅人,係對死者及家屬造成二次傷害,咁第一次,係邊個傷害死者呀?即係佢哋知道有人傷害過死者啦?邊個?!





作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情: https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料: https://t.me/nextmaghk

最新消息: https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情: https://s.nextmag.hk/e/Tssefy687Z